Serenissima Regia Maiestas et Domine, Domine clementissime. Humillimam perpetuae meae servitutis commendationem.

Ista hora fuit apud me factor Velzerorum, qui mihi dixit, si litteras meas fortunae velim committere cum aliis, quas ipse per Galliam terra missurus esset, ut scriberem. Quam opportunitatem, licet dubium sit, an perveniant, nolim neglegere, unde cum et breve mihi scribendi tempus est assignatum, et ut litterarum fasciculum, quantum possem, facerem tenuiorem iniunctum, compendiosior esse cogor, quam velim.

Scripsi novissime Maiestati Vestrae Serenissimae vicesima mensis Februarii praeteriti cum domino Cornelio Duplicio Sceppero, caesareae maiestatis consiliario et oratore ad Maiestatem Vestram Serenissimam, quas iam pridem redditas esse spero. Inde et ex eodem oratore Maiestas Vestra Serenissima omnia, quae hic acta sunt, abunde accepit, quae si ad praesens velim repetere, et longum esset, atque etiam non adeo tutum. Alia, quae interea se obtulerunt, sic habent in compendio.

Agimus hic in his curtis, hoc est in conventione primorum et statuum Castiliae pro nervo conflando, quem futurum dicunt immensum, ceterum adhuc non est conclusum, quandoquidem procuratores quaedam ad suos rettulerunt, a quibus responsum exspectatur.

Caesar hinc versus Valenchiam ante festa Paschae ire decreverat; verum mutata sententia ob responsum, quod a statibus praestolamur, post Pascha 16 Aprilis fertur profecturus; iam enim conventum pro prima die Maii in Monsom oppido, quod est medium inter Aragoniae et Castilliae regnum, indixit, et alium tertia Iunii in Valenchia. Ingens auri vis speratur suntque ad eam contribuendam Hispani undequaque satis propensi, et ut sunt animo semper elatiore, male eos id habuit, quod isti reges in Hispania bellum indicere ausi fuerint, dicunt hoc numquam prius neque factum, neque auditum; quocirca multa caesari pollicentur. Sed nescio, quo pacto tam brevi tempore a 22 Ianuarii hic omnia quodammodo refrixerint; nihil hic fieri video, quod bello congruit, praeterquam quod dominus de Beauveyn cum duobus milibus Hispanis ex Hispali solvit cum classe satis tenui, quem aliqui ad Belgas, quidam in aliam partem tendere dicunt. Biscaius et Asturus, qui sunt ad litus Oceani, iam aliquoties vicinis Gallis naves onerarias, parvas tamen, cum commea[tu] abstulerunt, quarum numerum supra 70 fuisse ferunt. Concremarunt etiam quasdam miseras villas circa Bayonam et Bordigaliam. Angli et Galli ab utraque ripa multas naves h[abere] dicuntur, sic, quod nemo a Belgis huc traiicere possit, quo fit, quod hic simus mari ab utraque parte infesto et terra ipsa Gallia obsessi et velut in quandam insulam redacti, quod iam a multo tempore litteras habere nequivimus, idque neminem {quam} mag[is] quam me, conficit; quandoquidem 8 fere menses praeteriere, quo nulla[s] accepi, videorque mihi in demortuorum loco haberi. Hoc t[amen] plus temporum iniquitati ascribendum putavi.

Ex Italia solent huc venire postae, applicuitque pridie una, quae rettulit dominum de Lauthrecht captum, regis christianissimi recta versus regnum Neapolitanum profectum, cui se offeret obviam exercitus caesaris, qui fertur ex 17 milibus Germa[nis] et Hispanis constare, quodque paulo ante non procul ab invic[em] remoti fuerint, eosque non posse nisi conflictu disiungi; qua de re hic anxie eventus exspectatur, crediturque, quod summa totius belli ab eo dependeat. Dicunt etiam pont[ificem] novas conscribere gentes et novum exercitum 12 milium pedi[tum] Germanorum properare in Italiam. Quid hinc nascetur, exitus probabit.

Oratores omnes, qui hic fuerunt, praeter me et Portugaliensem, ablegati agunt in quodam castello Pozo dictum, 8 leugis a Burgos, et non dimittuntur, donec illi, quos caesar apud eorum dominos habuit, revertentur.

Essent pleraque alia scribenda, quae huic tempori credere non ausi, quapropter brevitati Maiestas Vestra Serenissima dabit veniam. Cui me humillime ut domino meo clementissimo commendo atque supplico, dignetur tandem post quartum annum reditus mei clementem habere rationem, et cum me revocare dignabitur, ut litterae ad regem christianissimum mittantur, quibus salvo condu[c]tu habito per Galliam libere transire possim.

Datae ex Madril sive Madritio, oppido regni Toleti Hispaniae 27 Martii anno Domini 1528.

Serenissimae Maiestatis Vestrae Regiae humillimus servus Ioannes Dantiscus