Denn ersamenn, namhafftigenn hernn burgermeister unnd rath[man]enn der koniglichen stadt Danczke, / [unsern] gunstigen freunden /

Unnsernn freuntlichenn grues / mith erbittung, was wir liebs unnd guts vormugenn, zuvoran. / Ersame, namhafftige hernn, gunstige freunde. /

Unser kirchenn stadthalder, denn wir geseczt, / ist hie beÿ uns gewest, / mith dem wir vorlossenn, / so her Ewr Erbarkeit angenhem unnd gefallenn ist, / das her inn allenn sachenn / zcw Ewr Erbarkeit zcwflucht soll habenn / unnd alle dasselbige thun, was her schuldigk unnd Ewr Erbarkeit zcw willenn thun kann, / derhalben wir Ewr Erbarkeit vleissigk bittenn, / woltt inn mith alle seinem anligenn bepholenn unnd handt habenn, / nemlich wider denn officiall, / der uns unnd die unsernn / keine rechenschafft thuende, / unnd sunderlich diesenn unsernn stadthalter / tuth vorfolgenn, das wir mit der czeit woll findenn wollenn. / Auch bittenn wir, / wie auch der her erczbischoff unnd der her vonn der Coÿenn an Ewr Erbarkeit geschriebenn, so Ewr Erbarkeit die prediger inn unser kirchenn seczen, / wold Pancracium darzcw haltenn, / das her nichts anders, dan das heilige ewangelionn, / wie dasselbige die cristliche kirche / unnd unser altt herkomende vetter gepredigeth und vorstandenn, / predige unnd deutte, / nichts dorauss entwerffe unnd dem gemeÿnnem manne vorsage, / woraus das irthumb, das negst gewest, / unnd andere schwere auffrur mochtenn erwachssenn, / hierinne thunde Gotte dem allemechtigen sunderlichenn unnd schuldigenn dienst, / koniglicher maiestet willen, / Euch selbst nucz unnd ehre mith behaldener eintracht, / unnd unns allewege zcuvorscholdenn / ein grossenn wolgefallenn. / Warinne wir widerumbe Ewr Erbarkeit viel liebes unnd freuntlichenn willenn / mith der tath werden wissenn zcuerczeigenn, / wollen wir alleczeit bereithwilligk gefundenn werdenn. / Gott der allemechtige enthalde Ewr Erbarkeit inn langweriger gesuntheit unnd gelugseligem zcw nhemenn lange czeit. /

Datum uff unserm slosse Lobaw, denn 29. Novembris im 1532 / jore.

Ioannes, bischoff zu Culmen manu propria