Den ersamen, namhafftigen hern bugermeister und roth[mannen] der koniglichen stadt Danczke, [unseren] [gu]nstigen freundenn

Unsern fruntlichen grues mit erbittung alles gutten zuvoran. Ersame, namhafftige hern, gunstige freunde.

Unser underthan Anthonius Ehelich, / czeiger disses briffs, hot uns bericht, / wie das in und andre seine freunde nocht totlichem abgang Mertten Methbrewers, burger zw Danczke, / eczliche erbgutter angestorben sein, / welche er dan ouch gefurdert, im ouch von ein ersamenn roth zwgetheilt sein wurden. Hot sich aber von seinet und seiner freuntschafft wegen must vorburgen, die czehende margk von sulchen guttern der stadt abzcelegen. / Wie dem allem, ist an Ewr Erbarkeit unser freuntlich bitt, wolt gedochtem unserm underthan und seiner freuntschafft solch gutter an alle enthgeltung, / so ferre es gesein mag / und Ewrm recht nicht zw wider, folgen lossen, / das wir dan umb Ewr Erbarkeit und der selbten vorwanten Got dem almechtigen befhelend zwbeschulden alleweg wollen geneigt sein.

Datum uff unserm slosse Lobaw, den 27 tag Aprilis 1534.

Joannes, von Gots gnaden bischoff zw Culmenn, administrator des bischtumbs Pomezan