Den ersamen, namhafftigen hern burgemeyster und ratmane der konniglichen stadt Dantzke, unsern gunstigen freunden.

Unsern freundtlichen grus und alles guthe zuvoran. Ersame, nhamhafftige hern, gunstige freunde. /

Was wir von fustlicher durchlaucht gestrigs thags vor schryffte entpfangen, / wirdt beygelegte copey mytbringen, / daruff Ewer Erbarkeit wer zu rathslagen, / was von uns und sondren hern an de auch der gestaldt geschryben zu antwurtten wer, / und ab uns bekwemenn wil uff zukunfftige thagfart seynner durchlaucht botschaffter zu koniglicher majestet, unseres allergnedigsten hern, landen gemeynen geschefften und gebrechen zuvorhandlen bytten oder begeren. Was dan hirynnen Ewer Erbarkeit gut duncket zu thun, / das selb uns und den widern gern nicht wolthen vorhalthenn, / damit wir eintrechtiglich was zu antwurthen vonnothen / under uns entsloszsenn. Gotte in sein gnad bofolhen. /

Datum Heylsberg, den XV Marcii M D XXXIX.

Ioannes, von Gots gnadenn byschoff zu Ermelandt.