Den ersamen, namhafftigen hernn burgemeyster und rathmanne derr koinniglichenn stadt Danczke, / unsernnn gunstigen freunden.

Unsernn freuntlichen grus und alles gutn zuvorann. Ersame, nhamhafftige hern, gunstige freunde. /

Wir haben gestrigs thags Ewer Erbarkeit schreybenn / an uns und den hochwirdygen hern von Colmeshe / bey dysem bothenn erhalthen , / und nicht sonder swermuticheyt doraus vornhomenn, / wy Hieronimus von Szelaslaw alle byllicheyt und recht vorlassen / Ewer Erbarkeit hab abgesagt, / darneben auch Ewer Erbarkeit bytten, an konigliche majestet, unsern allergnedigsten hernn, derhalben neben andern dyser landt herrn rethe zu schreybennn, / dartzu wir mit vleys gewylligett, und durch gedachten Ewer Erbarkeit bothen an den hochwirdigen hern zu Colmeshe solch Ewer Erbarkeit schreyben mit dem unsernn / des fhals lassen gelangen. / Wollen uns auch mit seynner lieb, / was gestalt noch Ewer Erbarkeit begeren koniglicher majestet hirynne zu schreyben sey, / entslyssen, / wy solchs Ewer Erbarkeit auss seynner lyb antwurt gruntlicherr und weytther werdenn haben zuvorsthenn, / dan Ewer Erbarkeit, / dy wir Goth in sein gnad befelhen, / vyl freuntschafft und furderung zu thun / sein wir alczeyt wyllig und geneygt. /

Datum auss unserm sloss Heylsberg, den lecztenn Iulii M D XXXIX.

Ioannes, von Gots gnaden byschoff zu Ermelandt.

Wy Ewer Erbarkeit im eingelegten zcedel bytten, / den bryff durch unsern bothen gen der Löbaw XV meyl wegs von hinnen unvorsewmlich an den hochwirdigen herrn von Colmhese zu schicken, / hab wir unnötig geacht, dyweyl Ewer Erbarkeit dynerr fueglich dohin sich muge begebennn / und von dannenn antwurt bringen. / Datum ut in litteris.