Dem edelen unnd ernvhesten hern Hansen von Werden, burgermeister und burggraf der koniglichen stad Dantzke und heubtman zu Neuenburg, unnserm gunstigen freunde.

Unsern freuntlichen grus mit aller seligheit wunschung zuvoran. / Edeler, ernvhester her, gunstiger freundt. /

Wir haben gestriges tages Ewer Herlichkeit schreiben erhalten, / in welchem uns Ewer Herlichkeit vil danckens anzeigt von wegen ir selbst und irer freundschaft, / das unnottig gewest, / dieweil wir so was nutzlichs durch uns gescheen gern / und der billigkeit nach gethan, / auch uns solchs zuthun schuldig wissen etc.

Der schade unserm vaterlande durch die straff Gottes zugeflossen, / ist uns hertzlich leitt. / Wollen gotliche barmhertzigkeit helffen bitten, / das die solchen zorn abwende und den in gnade wandele, / doneben auch wie Ewer Herlichkeit begert mit andern herren dieser lande koniglichen rethen doran sein und helffen rathen, das diesem ferlichen zufalh muge vorgesetzt und widderumb zu gute gereichen etc. Wie diese tageleistung zurgangen, ist Ewer Herlichkeit unverborgen. / Wan jeder sein bekuemigkeit sol suchen, / wolle wir uns auch in zukunftigen zeitten nicht abstehen etc. Diesen tag nehme wir unsern weg von hinnen nach Braunsperg / und wollen dis spaciren dis m...l so gethan uns zue witze lassen sein. / Hiemit Ewer Herlichkeit Got dem almechtigen in sein gnade bevolhen etc.

Datum Elbing denn funfften tag Marcii M D XL.

Ioannes, bischof zu Ermelant subscripsit.