APG 300, 53, 269, p. 64

Den ersamen und namhaftigen herren burgermeister und rathmannen der koniglich(en) stad Dantzigk, / unsern besondern, guten freundenn /

APG 300, 53, 269, p. 59

Unsern freuntlichen grus unnd alles gutt zuvoran. / Ersame, namhaftige herren, besondere, gute freunde. /

Gestrigs tags nach abzege der edlen, wolgebornen herren elbingischen und dantzker castellen, / marienburgischem underkemmer / und E(uer) E(rbarkei)t geschicktenn, / ist ein koniglicher kemmerer an uns gelangt, / welcher uns ko(nigliche)r m(aieste)t, unsers allergnedigisten herren, / brieff an die hern rethe dieser lande vorzeichent, / des copei hie eingeschlossen, / hot uberantwort. / Weil das dazumalh hie nach gewesen seint / der hochwirdig her bischoff zcu Colmen / und der ersamen von Thorn geschickter, / sein wir / zu uns die ersamen hie des raths fordernde / zusammen kommen, / uns dieser sachen / inhalt koniglichs briefs / undereinander beredt / nichts fueglicher mocht finden, / dan das wir hochgemelter ko(nigliche)r m(aieste)t die meinung zuschrieben, / wie oben gemelt / und das wir solchen ko(nigliche)n brieff / ader copeien dovon / andern stenden des raths dieser lande wolten lassen zukommen, / was dan in der kurtze durch schreiben einer zum andern mit solchen schriften under unns wurde entschlossen, / irer ko(nigliche)n m(aieste)t widderumb lassen wissen. /

Von der sachen in sich selbst mit den herren hir hab wir nichts anders nutzlicher bedocht, dan das ein vorschub und erstreckung der zeit / bis auf negstkunftige tagfart wurde von ko(nigliche)r m(aieste)t gebethen / mit vorbehalt, / was sonst einem jedern zu diesem handel das beste wurde beduncken, / das wir das APG 300, 53, 269, p. 60 schriftlich einer dem andern liesse wissen. / Solchs, so an uns wurde kommen, / wolle wir mit dem hochwirdigen hern zu Colmen / under uns wol einnehmen / und des meisten teils stimmen zum antwort an ko(niglich)e m(aieste)t zufertigen, derwegen Euer E(rbarkei)t wolde uns mit den ersten iren willen und votum wissen lassen, / die wir hiemit in langweriger gesuntheit gotlichen gnaden bevelhen. /

Dat(um) Elbing, denn XXVI tag Ianuarii M D XLV.

Joannes, von Gottes gnaden bischof zu Ermlanndt /