AAWO, Ab, D. 5, f. [1v] missed in numbering after f. 58

Dem hochwirdigistnn inn Got furstenn / unnde herr(e)nn her(e)nn Joanni vonn gotchgnodenn bischoff der kirchenn Colmensche unnde admi(ni)stratori das bischthumes zcu Pomezann / das bischthumes zcu Ermelandt ausserweltenn her(e)nn unnsserm allergnedigistenn herr(e)nn

AAWO, Ab, D. 5, f.58r

Hochwirdigister inn Got vater, gnedigister furste unnde herre. / Unnßer demutiges, inniges gebethe / unnde was on the margin⌈waswas on the margin⌉ wir sunst gutt(es) unnde dinstliches vormog(e)nn Ew(e)r F(urstlichen) G(naden) stetiglich zcuvorann. Hochwirdigister / g(nediger) furste unnde herre. /

Wir seint wordenn vorstendiget, / wie das eine kortczlich uff Andree / die koniglichs zceysse angehenn ssall, / vonn welcher nymand(en) her ßey, geistlich / ader wertlich, / die abzculeg(e)nn underlaessenn ßol werdenn. / Szo wollenn wir Ew(e)r F(urstlichen) G(naden) alze unnserm gnedigistenn herr(e)nn nicht bergenn, / das unns durch vorbeths ko(nigliche)r ma(ieste)t u(nserm) a(ller)g(nedigsten) h(e)rr(e)nn der lande Prewßenn hochwirdige(n) rethe / ethwann / bey erer ko(nigliche)n ma(ieste)t / eyne begnodigunge unnde freyheit / ßogethoner zceyße, / wie die moge gena(n)t / unnde angesaczt werd(en), / gnediglich erlanget, / alze diesse eingeschlossene copia, / die wir Ew(e)r F(urstlichen) G(naden) demutiglich thun zcusende(n), / mittebrenget, / bittende hochlichenn / unnde gantcz demuttiglichenn Ew(e)r F(urstliche) G(nade) alsse unnsernn gnedigiste(n) herr(e)nn, / die selbige gutlich entpfang(e)nn / unnde noch gnediger vorlesunge / innehaltcz / seiner ko(nigliche)n ma(ieste)t begnodigunghe unnsse bey sulcher freyheit / durch Ew(e)r F(urstliche) G(nade) hulfflichenn beschirmu(n)ge / bey ko(nigliche)r ma(ieste)t auserkorne(n) pobortczenn, / ader wo dys vonn nothenn, / gnediglich / alsse u(nser) g(nediger) h(e)rre schutczenn / unnde hanthabenn, / domit wir vormittelst Ew(e)r F(urstlichen) G(naden) hulffe / mochtenn do bey bleibenn unnde gelaessenn werde(n). Hab(e)nn zunderliche zcuvorsicht / unnde vertrawenn zcu Ew(e)r F(urstlichen) G(naden) alze zcu u(nserm) g(nedigen) her(e)nn, unnss(e)re fleissige / unnde demutige bethe / angeseh(e)nn, unns gnedigk wirt erscheinenn, / mit gonstlicher trostunge erfrewenn, / wollenn wir kegenn Ew(e)r F(urstliche) G(nade) alse u(nsern) g(nedigen) her(e)nn allesampt / mit unnssernn innige(n) gebethenn zcu Gote dem allirhogstenn / stetiglich unnde allezceit widderum(m)b bereitwilligk vor Ew(e)r F(urstliche) G(nade) unnde all Ew(e)r G(naden) verwandtenn zcubittenn befundenn seynn, / der Ew(e)r F(urstlichen) G(naden) inn langkweriger hirschender gesuntheit geruche zcuenthaldenn / unns armenn zcu sunderlichem troste / unnde gnedigenn anhalt. /

Gegeb(e)nn im jungfrawenn closter zcum Culmenn, denn XX tagk Novembris im XV-c unnde XXXVIIst(en) jare.

Ew(e)r F(urstlichen) G(naden) demutighenn Katharina abbatissa / mit sampt gantczenn convent / das jungfrawenn closters zcum Culme(n)