Reverendissimo in Christo Patri et Domino, domino Iohanni Dei gratia episcopo Culmensi et administratori Warmiensi et Pomezaniensi, dignissimo domino nostro, gratiosissimo et colendissimo

Reverendissime in Christo Pater et Domine, domine gratiosissime et colendissime

Continua servitiorum et orationum commendatione humiliter praemissa.

Gratias immensas ac immortales habemus Reverendissimae Paternitati Vestrae pro eo, quod ex sua clementia rationem bonam habendo ecclesiae suae in Culmenze illa residua bona per dominum Albertum noviter in Domino defunctum relicta, cuius anima in caelesti curia in perpetuum vivat, qui certo tempore bonis capituli praefuit in Kawrnick ibique omnem suam substantiam paene congessit et aquisivit, pro curia capituli sui relinquere dignata est, ne curia illa omnibus suis necessariis post bella proxime habita non modica capituli impensa conquisitis omnino destituta maneret, illa tamen condicione adiecta, quod exsequiae praefato domino Alberto defuncto omni anno modo solito et ex co[ns]uetudine aliorum anniversariorum peragantur. Quam condicionem nos gratissimo [accep]tamus animo, desiderio Reverendissimae Paternitastis Vestrae et illius saluti obsequendo, utque illa i[bi reli]cta bona integra pro usu dictae curiae permaneant, dignetur Reverendissima Paternitas Vestra de[man]dare. Oramus obnixe, ut eadem curia tant<o> meliorem provisionem habeat pro [ho]nore ecclesiae sanctae et individuae Trinitatis, primae sponsae Reverendissimae Paternitatis Vestrae, et commodo capituli, eandemque Reverendissimam Paternitatem Vestram clementiae divinae in perpetuum felicissime conservandam committimus et nos suae gratiae singulari commendamus.

Datae in Culmenze proxima tertia feria ante diem sancti Thomae apostoli anno Domini etc. XXXVII-o.

Eiusdem Reverendissimae Paternitatis Vestrae humiles capellani et servitores, capitulum ecclesiae Culmensis