Dem Hochwirdigen in Gott Fursten unnd Herrenn, herrn Johanni von Gottis genaden des loblichen stichts zu Ermelannt Bisschoven etc., unserm genedigen herrn

Hochwirdiger inn Gott Furst, Gennediger Herr. /

Unnser stette unnd unvordrossene dienste / seint Ewer Hochwirdigste Gnade zuvorann entpholen.

Genediger Herr.

Nochdeme dann die erbarenn / namhafftigen und weisen herrnn Bartholt Branndt unnd herr Tidemann Gysze / unnsere gelipte herrnn burgermeistere / kurtz vorschinener zceit von koniglicher maiestatt / unserm genedigstenn herrnn / an uns mit begier unnd hochgedochter koniglicher maiestatt gennediger expeditionn widderummb gelanngt / unnd unns mit besunderm lobe / Ewer Hochwirdigste Gnaden gennedige furderunge unnd vorbitt. / So dieselbige nicht alleine bey koniglicher maiestatt besunder och denn hochwirdigstenn rethenn der loblichenn Kronen habenn zcutreglich geruchet ergehenn zcu lassenn, / zcu erkennen gegeben. / Thun wir nebenn irenn erbarkeiten vor dieselbigenn genedige angewante furderunge unnd vorbitt Ewer Hochwirdigste Gnade vormittelst disem unserm brive besunder dinstliche unnd fleissige danncksagung. Wollenn ouch solchs inn allewege umb Ewer Hochwirdigste Gnade unser bestenn unnd hogstenn fleisses noch vormogenn wilfehrigk zu vordienenn bereith und geflissenn befundenn werdenn.

Mit hulffe des Almechtigenn, der Ewer Hochwirdigste Gnade lange unnd seliglich enthaltenn wolle.

Datum Dantzigk, denn VII Aprilis anno etc. 44

Ewer Hochwirdigsten Gnaden dinstwillige burgermeistere und rathmanne der stadt Danntzigk