AAWO, AB, D.97, f. 212v

Dem Erwirdigenn inn Got, unnserm besondern liebenn freundt unnd nachbarnn, / herrnn Johansenn bischovenn zw Ermelandt etc.

AAWO, AB, D.97, f. 212r

Unnser freuntlich diennst zuvornn. /

Erwirdiger inn Gott, / besonnder lieber freundt unnd nachbar.

Wir fugenn E(uer) L(ieb) freuntlich zuvornemenn, / das unns eylennde henndel konig(lich)e m(aies)t(e)t zu Polan etc. unnd diese lannde betreffennde / vorgefallen, / die wir irer konig(liche)n m(aies)t(e)t inns schleunigest zueroffnenn geursacht / seint derhalben bedacht, / unnsernn diener ganntz furderlich / genn Crackau abzufertigenn / unnd gelangt. Derwegenn ann E(uer) L(ieb) unnser freuntlichs bithenn / dieselbe wolle unnbeschwert seyn / inn irer stat Helspergk diese bestellung thun zulassenn, / damit solcher unnser gesannther auf seynn annkunfft / drey frische pferde mit sielenn unnd andern zu behorung furder hanndt gewislichenn findenn unnd dieselbenn umb sein gelt bis gein Altensteynn, / do er unnsers versehenns anndere findenn wirt, / gebrauchen unnd so balt er genn Heÿlspergk gelanngt / bey der wirttin Knoblochsdorffin, / wo er die pferde zufordern wissenn moge. /

Verhoflich, E(uer) L(ieb) werdenn sich inn dem wilferig erzeigenn. / Das seÿnnt wir umb E(uer) L(ieb) zuvordienenn urpittigk. /

Dat(um) Konigspergk, denn XXV Maii anno etc. im XLVIII-st(en).

Vonn Gots gnadenn Albrecht margg(ra)f zu Brandenburg, inn Preussenn, zu Stettin, Pommern, / der Cassubenn unnd Wenden hertzogk, / burggraf zu Nurmberg unnd furst zu Rugen