Dem Hochwirdigstenn inn Gott Furste unnd Herrenn, herrenn Iohanni von Gots genadenn des löblichenn stichts zcu Ermelandt bisschove etc., unnserm gennedigenn herrenn

Hochwirdigster inn Gott Furst, Gennediger Herr. /

Unnser stette bereidtwillige unnd unvordrossene dinste seindt Ewer Hochwirdige Gnade besunder gefliessener andacht zcuvoran entpholenn. /

Gennediger Herre. /

Wier habenn in etzlichem unser unnd der stadt obligenn / die erbarenn unnd namhaftigen herren Georgenn Mölner unnd Johan Brandes, unsers raths geliebte freunde, zceigere dieses, ann Ewer Hochwirdige Gnade dinstlich abgefertigett, / wie auch hiemit abefertigen. /

Dieselbige Ewer Hochwirdige Gnade dinstlichen fleisses bittende wolle ihnen gnedigen zcutridt und vohör vorlehnen. / Auch alle deme wer sie Ewer Hochwirdige Gnade in unserm namen antragen werden sam uns so wier jegenwertigk weren volkommenen glauben gebenn / unnd dieselben widderummb an uns mith gnediger expeditionn gelangen lossen.

Dasselbige seindt wier ummbe Ewer Hochwirdige Gnade (die wir dem almechtigen Gott zcu langen gesunden unnd gluckseligen tagen im friedlichen regiment zcu enthaltenn mith vleis en[t]pholenn) zcuvordienen willigk.

Datum Dannczigk, den letzten tag der m[o]nats Februarii anno etc. 43. /

Ewer Hochwirdige Gnaden diennstwillighe burgermeistere unnd rathman[e] der stadt Danntzigk