Dem Erwirdigenn in Goth, unnserm besundernn liebenn freunde unnd nachbarnn, herrnn Johansen bischoffen zu Ermelanndt

Unnser freuntlich dinst zuvor.

Erwirdiger in Goth, besunder lieber freundt unnd nachbar. /

Nachdem sich irrung unnd gebrechenn zwischenn denn erbarnn unnsernn liebenn getrewenn Georgenn, / Daniel unnd Brosie gebrudere unnd vettere vonn Kolbitz an einem unnd Cristoff Wenskoffsky belangendt ein personlich anspruch etlicher schuldenn, so die Kolbitzer zu im zuhabenn vormeynent anders tails. So das derselb handell durch unnsere hoff unnd gerichts rethe, / weyl bemelter Wnskoffskÿ unnder Euer Lieb sashafft fur dieselb Euer Lieb zuentrichtenn gewyesenn. / Unnd aber berurte vonn Kolbitz gewilliget Euer Lieb nach irer gelegenhait umb einen tag zu besuchenn unnd denn hanndell zuvormeidenn weiterung unnd so ferns dem gegenpart thulich gutlich vortragen zulassenn wolgewilligt etc.

Unns darauf umb ein furdernus schrifft ann Euer Lieb zuthun in underthenigkeit gebetenn unnd angelangt. / Unnd weil es vast arme gesellenn unnd viell nachreysenn und uncosten zuthun nÿt inn irem vormogenn, / so ist demnach ann Euer Lieb unnser freuntlich bieth, so solcher handell fur Euer Lieb gebracht, / dieselbenn wolten die wege furnemenn, / damit die parth in der guthe unnd freuntschafft vortragen unnd hinfurt als freunde gegenn eynander lebenn mogenn unnd unnser gethane furbieth beÿ Euer Lieb ersprisslich zuentpfindenn habenn. / Das wollenn wir umb dieselb Euer Lieb in gleichem unnd mehrerm alleweg freuntlich unnd nachtbarlich beschuldenn.

Datum Konigsbergk, denn 7-ten Martii anno etc. im 40-ten.

Von Gots gnaden Albrecht, marggraf zu Brandenburg, in Preussenn, zu Stettin, Pommern, der Cassuben und Wenden hertzog, burggraff zu Nurmbergk und furst zu Rugen