Dem erwirdigenn in Gott unnserm besonndern liebenn freunt unnd nachbarnn hern ⌊Johannsenn bischoffen in Ermlandt⌋
Unnsere freundtliche dinst zuvornn.
Erwirdiger in Gott besonnder lieber freundtt unnd nachbar.
Wir habenn Euer Lieb ⌊⌋ datum ⌊Heilsbergk⌋ denn XIIII Septembris empfangenn / Unnd daraus wes sich dieselb sampt irem ⌊capithell⌋ ober denn erenvhestenn unnsern obermarschalch rath unnd liebenn getreuenn ⌊Fridrichenn vonn der Olsnitz⌋ etc. vonn wegen seines mulbaues zu ⌊Borckersdorff⌋ beschwerenn / unnd disfals bey unns bithenn thutt vorstandenn. Hierauff fugenn wir Euer Lieb freuntlicher nachbarlicher meynung zuvornhemenn, weil wir vonn solchem das ehr die ⌊Passarienn⌋ gantz uber unnd uber bepauet / unnd dardurch dem flossenn schadenn geschicht kein wissenschaft, / zu dem auch benenter unnser marschalch ⌊Friderich vonn der Olsnitz⌋ itzo nicht bey unns ahnn unnserm hoff mit welchem wir derhalbenn weither zuredenn / unnd aller gelegenheit des handels ahnn ime zuerkundigenn. So konnenn wir Euer Lieb wie gernn wir es auch thettenn entlichenn nicht beantwurthenn freuntlich bittennd Euer Lieb unns derhalbenn nachparlichenn entschuldigt habenn wolde. / Nichtsweniger aber wollenn wir unns des handels gelegenheit allenthalbenn inns furderlichst erkundigenn / unnd unnserm ⌊marschalch⌋ Euer Lieb briff zuschicken, seinenn gegenbericht einnhemenn unnd alsdann / nach gnugsamner erforschung dises gantczenn handels derselbenn unnsers gemuts meynung entdeckenn.
Das habenn wir Euer Lieb die wir hiemit dem Almechtigenn in seinenn schutz empfelen freuntlicher nachbarlicher meÿnung nicht pergenn wollenn.
Datum ⌊Konigspergk⌋, denn 16 Septembris anno 1540.
Von Gotts gnaden ⌊Albrecht marggrave zu ⌊Brandenburgk⌋, in ⌊Preussen⌋, zw ⌊Stettin⌋, ⌊Pommern⌋, der ⌊Cassuben⌋ und ⌊Wenden⌋ hertzogk⌋, burggraf zu ⌊Nurembergk⌋ unnd fürst zu ⌊Rugenn⌋
