Dem erwirdigenn inn Got, unnserm besonndernn liebenn freundt / unnd nachparnn, herrenn ⌊Johannsen bischoeffen zu Ermelanndt⌋
Unnser freuntlich dinst zuvor. /
Erwirdiger inn Got, besonnder lieber Freundt unnd nachpar. /
Nachdem sich zwischenn unserm unnderthann und liebenn getreuenn ⌊Georgen Lautenschlager⌋, / statschreiber der stadt ⌊Kneiphoff Konigspergk⌋ ann einem / unnd Euer Lieb unnderthanenn / etzlichenn ⌊inwonernn vom Braunsperge⌋ annders theils irrungen einer erbschafft zugetragenn, / daraus sich ervolgt, / das ein ersamer ⌊rath / bemelter stadt Braunspergk⌋ auch darein geflochtenn unnd sich etzliche ubergebene setze vor iniurienn anmassenn unnd vor Euer Lieb geortert werdenn sol. / Dieweil aber benenter ⌊Lautenschlager⌋ / der sachenn unnd hanndlung gernn abkommen wolt, / hat er unns ann Euer Lieb umb ein furbetlich schreibenn, / dardurch er vonn derselbenn ein vhelich sicher unnd cristlich geleith zuvorhar der sachenn bekommenn mocht, / undertheniglich gebethenn. / Unnd wiewol wir wissenn, / das Euer Lieb menniglichenn zur billigkeit gewogenn, / auch des geleits von unnotenn / so habenn wir doch / unnsern ⌊unnderthann⌋ solch sein bith / zu furderung des hanndels nit abschlagenn mogen. Ist demnach unnser freuntlich bith, / Euer Lieb wollenn umb unnsert willenn hierinnen sich nachparlich ertzeigenn / unnd bemeltem unnserm unnderthann / ⌊Georgenn / Lautenschlager⌋ / ein sicher cristlich vhelich unnd unngevert geleit fur Euer Lieb unnd derselbe[n] unnderthanen / uberschickenn. / Damit der hanndlung umb sovil dester eher abgehulffenn / unnd die partenn inn ruhe unnd einigkeit kommen mochtenn. / Das sein wir gleichsfals gegenn Euer Lieb unnd dem... eurenn zuthun geneigt. / Wollenn auch solch... umb Euer Lieb freuntlich verdienen. /
Datum ⌊Konigspergk⌋, denn 19 Ianuarii anno 1541.
Vonn Gots genaden ⌊Albrecht marggraf zu ⌊Branndenburgk⌋, in ⌊Preussenn⌋ etc. hertzog⌋
cancellarius scripsit
