Dem Erwirdigen in Got, unnserm besondernn lieben freundt unnd nachparn, hern Johansenn bischoffenn zu Ermlanndt

Unnser freuntlich diennst zuvornn. /

Erwirdiger inn Gott, besonnder lieber freund unnd nachbar. /

Wir konnenn Euer Lieb freuntlicher / nachparlicher meinung nicht vorhaltenn, / das wir Euer Lieb antwurt / das gebethene geleidt betreffend / unnserm underthonenn / unnd liebenn getreuenn / Jurgenn Lauthenschlager / auch unnserm liebenn getreuenn des raths unnser stadt Konigspergk Kneiphoff stadtschreibernn vorlesenn lassenn / unnd nichts destweniger, / darnebenn vor nutz angesehenn / unnd gerathenn / das dieselbigenn irrigenn sachenn zwischenn ime / unnd Euer Lieb underthanenn denenn vom Braunssbergk (umb vormeidung anderer weÿtterung, / muhe / unnd kostenn / allenthalbenn) inn der sune vorfasset unnd beÿgelegt werdenn mochtenn, / unnd als wir inenn denne zu dem auff diese unnser anregung nicht ungeneigt befundenn, / hat er unns widerumb undertheniglich gebethenn, / wir woltenn ime in dem falle auch bey Euer Lieb als seÿnes widertheils derenn vonn Braunssbergk ubrigkeitt furderlich erschienen

Dieweill wir denne / ausserhalbe obgemeltenn Lauthenschlager vonn anndernn bericht wordenn, / das baufellickeit beÿderseits vorhanndenn seinn solle / habenn wir nicht untherlassenn, / Euer Lieb underthanen so woll, / als dem unnsernn zu furderung / unnd bestenn, / dem achtbarnn unnd wolgelertenn unnsernn rath / unnd liebenn getrewenn / Johann Lohmullernn / (denn wir sonnstenn uff dissmall unnserm lanndtgericht so dingstags nach Invocavit zu Hohensteinn gehaltenn werden soll zugeordennt) auffczulegenn inn seiner widerwyssenn Euer Lieb inn unnserm nhamenn anczusprechen / unnd mit Euer Lieb vonn wegenn solcher sinnlichenn beÿlegung zuvorhandelnn. / Bittenn derwegenn Euer Lieb woltenn gemeltenn Johann Lohmuller gnediglichenn vorhorenn / und inn dem falle inn unnserm nhamenn, / gleich unns selbst vollenkomenn glaubenn beÿmessenn.

Dasselb seinnt wÿr umb Euer Lieb (die wir Gott dem almechtigenn zu langwerender gesuntheitt entphelenn) inn allem gutenn freuntlich zuvorgleichenn gewilliget. /

Datum Konigspergk, denn 3 Martii anno 1541 etc.

Vonn Gots gnadenn Albrecht, / marggraff zu Branndennburgk, / inn Preussenn, / zu Sttettinn, / Pommernn, /der Cassubenn / unnd Wenndenn hertzogk, / burggraff zu Nurmbergk / unnd furst zu Rugenn / manu propria subscripsit