Dem erwirdigenn in Got unnserm besonndern liebenn freundt unnd nachbarnn herrenn Johansen bischoffenn zu Ermelanndt

Unnsere freuntliche dienst und was wir liebs und guts vermogenn, / zuvor.

Erwirdiger in Got besonnder lieber freundt unnd nachpar. /

Inligende habenn Euer Lieb zuersehenn mit wasser instruction unnd beveleh der durchleuchtig grosmechtig furst unnd herre, / her Sigmund konig zu Polen etc., unnser gnedigister her und freuntlicher lieber ohem / des erwirdigenn in Got unnsers besondernn lieben freundts herren Samuel Matzievssky vicecanzlers unnd bischoffen zu Chelmen, bruder Stanislaum Matzievssky / in unsernn sachenn / die acht belangende, / ann Romische keyserliche maiestet uff iczigen reichstag gegenn Regensburgk gefertigt. / Weil unns dann seine koniglichee mayestet zulest, / wes wir in der instruction zuendern ader bessern wusten / dasselbig zuthun. / Wir aber wissenn, / wie preisslich unnd statlich Euer Lieb ehrmals diesenn handel bei Romischer keyserlicher unnd koniglicher mayesteten auch andernn stenden / uff gemeinenn reichstag getriebenn unnd gefurdertt. /

So bittenn wir gancz freuntlich, / Euer Lieb wollen unns zu gefallenn diese instruction so eÿlende zu ubersehen, / unnd wes ir darine zu endern ader bessern gefelt oder gutdunckt, / dasselbig unns mitzutheilenn / unbeschwert sein. / Inn sonnderheit aber, / wo was vonn kegenwurffenn uff furfallende disputation, / zuerhaltung hochgenenter koniglicher maiestat ius und gerechtigkheit / des von nodten / und waruff die wal gehenn solten, / des wollen unns Euer Lieb sampt widersendung dieser instruction, / dann wir solchs alles dem koniglichenn gesandten ins furderlichste nachzuschickennn, / irenn rath unnd gutbeduncken schrifftlichen zufertigenn. Das seindt wir umb dieselb Euer Lieb zuverder um[b] freuntlichen zuvordienen urbutig. /

Datum Konigsberg, denn XXX Martii anno etc. im XLIten.

Von Gots gnaden Albrecht marggrave zu Brandenburg in Preussen und herczog etc. manu propria subscripsit