Dem erwirdigenn ÿhnn Gott unnserm besonndern / liebenn freunth unnd nachparnn herrn Johansen bischoffenn zu Ermelanndt /

Unnser freuntlich dinst zuvorn. /

Erwirdiger ynn Gott besonnder lieber freundt und nachpar.

Wir gebenn Euer Lieb freuntlicher meynung hiemit zuvornhemen, das uns unsere underthane unnd liebenn getrewe / gegenwertige zcaigere furbracht habenn, / wie sie willens Euer Liebdenn ires gefangnenn freunds halbenn zuersuchenn / uns derhalbenn umb genedige forderung unnd furschrifft ahnn Euer Lieb zuthun, / yhnn unterthenigkeytt gebetenn, die wir inenn der pilligkeyt nach nit habenn vorsagenn mögenn. /

Demnach so ist an Euer Lieb unnser freuntlich bith, / dieselben woltenn inenn so vil sichs zu recht unnd der pilligkeÿtt gezcimett / genedigenn forderlichenn willenn erzceigenn / unnd unser furbett genissenn lassenn. / Das seint wir umb Euer Lieb yn alweg freuntlich unnd nachparlich zuvordienenn geneigt. /

Datum Konigspergk, denn drittenn Maii / anno etc. ihm XXXXI-ten

Vonn Gotts gnadenn Albrecht marggraff zu Brandenburgk, yhn Preussen, zu Stettin, Pomern, der Cassubenn unnd Wenden hertzogk, burggraffen zu Nuremburgk und furst zu Rugenn

Caspar Platenar