Den Erwirdigenn in Goth, / Edlenn und Ernves[ten] unnsernn liebenn Freunden, Nachparn unnd besondern liebenn, / hernn ⌊Johansenn zu Ermelandt⌋, / desgleichn hernn ⌊Tidemanno zu Colmennsehe bieschoffenn⌋, / ⌊Achatio Czemenn⌋ Mariemburgischen woÿwoden und ⌊Johansenn vonn Baÿsen⌋ Elbingschen casstellan einiglich und sonnderlich
Vonn Gots gnadenn ⌊Albrecht der Elther marggraff zu ⌊Brandemburgk⌋, in ⌊Preussen⌋, zu ⌊Stetyn⌋, / ⌊Pommern⌋, / der ⌊Cassuben⌋ unnd ⌊Wendenn⌋ herzogk⌋, burggrave zu ⌊Nuermberg⌋ und furst zu ⌊Rugen⌋.
Unnser freundtlich diennst unnd gnedigen willenn zuvorn. /
Erwirdige in Goth, / Edele und Ernveste, / liebe Freunde / unnd besonndere Liebe. /
Wir habenn Eur Liebd unnd eur andern ⌊⌋, / inn welchem ir denn erbarnn unnsern lanndrichtern im ⌊Morungschen⌋ unnd liebenn getrewen ⌊Geörgen Sackenn⌋ in ettlichenn verbrechungenn verbietten thuet, / empfangen unnd fernern innhalts zur notturfft lesennde eingenohmmen. / Nu habenn Euer Lieb unnd ir andern als die vonn Goth mit hohem verstandt begnadigt zuerachtenn, / wes es woll auff sich hat, / einen dahin zuberedenn, / dennjenigenn so uff sein selbs annhaltenn zu gefengniss gebracht, / widderumb heimlich aus abrichtung unnd fur schube annderer leuth auszuhelffenn, / dardurch nicht allein ⌊Geörgen Sackenn⌋, dem die schmach unnd unrath leider widderfahren, / sunder auch unns, unnsernn ⌊landen⌋ und leutten von eÿnem solchem muttwilligenn allerley gefhar unnd ander unrath zugewarthen / unnd ervolgenn möchte, / unnd wie gegen solchem vermuge der rechte zugebaren. / Unnd hettenn unns versehen dieweÿl berurther ⌊Georgenn Sack⌋ sich seiner sachenn also gewiss gewust / unnd fur unnschuldig gerumpt, / ehr solche sich billich uff unnser ime vorhin zu recht zugeschickt gleidt gestellet unnd sein verantworthung gethan haben. /
Dann wir verhöfflich unnd ohne rhumb bis annher inn unnserer regirung unnss also ertzeigt, das sich niemands einnher verkurtzung ader ubereÿlung mit fuegen zubeclagen. / Gleichsfals solt gegen ime wie auch noch gehanndelt werdenn seÿn, / zudeme solle sich der itzgofanngene ettwan unnser burggraff zur ⌊Lÿbmuhl⌋, / rhumen unnd hören lassenn. / Ehr ⌊Geörg Sack⌋ wolle neben ime stehenn / und inenn disfalss schadloss haltenn. / Aus welchem allem Euer Lieb unnd ir andernn leichtlich zuermessen wir unnss alss der geburennden obrickeith / inenn anderer gestalt / dann zu recht zuvergleichenn, / geburenn hat wollenn, / versehenn unns auch Euer Lieb unnd ir anndere / wurdett, / seinthemahl sie nun des hanndels ettwann berÿcht, / bey unns ein annders vortzunehmen nicht anngesucht haben. / Aber wie dem, / wahnn vilgedachter unnser unnderthan ⌊Georgenn Sack⌋ denn enntkomenen verwircker widderumb in denn orth daraus ehr enntwordenn gestelt. /
Wollenn wir ihme damit Euer Lieb und ir annder zubefindenn, / das wir gernn dennselben nachperliche freundschafft unnd gennedigen willenn in allem erherlichem zuertzeigenn geneigt, / beschehenem freundlichem unnd gutlichem annsiennen nach, / mit eÿnem freienn sichernn gleithe, / frey ab unnd zu aus seiner gewarsam unnd widder hienein versehenn. / Unnd ihme dass unnther unnserm secret uff sein annsuchen, damith ehr zuvorhör unnd antworth kommen möchte, / zufertigen, / ohne daz beruhen wir uff voriger ime ⌊Georg Sacken⌋ gegebener unnser antwort. / Welchs wir Euer Lieb unnd auch denen wir freundtlichen zudienen unnd gunstigen willen zuertzeigenn gneigt, / uf ir schreiben zu anttworth nicht pergen wollen. /
Vonn Gots gnaden ⌊Albrecht⌋ der Elther margraff zu ⌊Brandemburgk⌋, in ⌊Preussen⌋, zu [⌊Stetyn⌋], in ⌊Pommern⌋ etc., [der ⌊Cassuben⌋ unnd ⌊Wendenn⌋ herzogk, burggrave zu ⌊Nuermberg⌋ und furst zu ⌊Rugen⌋].
