Dem durchlauchten, hochgebornen fursten und hernnn, hern Albrechten, von Gots gnaden marggraff zu Brandenburgk, / in Preussen, zu Stetin, Pomern, der Cassuben und Wenden hertzog, burggraff zu Normberg und furst zu Rugen, / unserm hochgunstigen, lyben hern und freundt

Durchlauchter, hochgebornerr furst, hochgunstigerr, lyber herr und freundt. / Unser freuntliche, wyllige dinst zuvoran. /

Wÿ wir von den gnaden des almechtigen mÿt den unsern gesundt in unsere newe herschafft sein ankomen, / seÿ wir durch vyl der unsern bericht / dess thodtslages, so Mattes von Elditten begangen / und noch vÿler demuetiger bytt, an unss geschenn, / mit antzeÿgung, / wÿ das theters freunde / beÿ des erslagenen freuntschafft / solche sache in vortrag zu bringen vÿlmals gesucht haben / und bys her nichts haben mugennn erlangen, / und yst alein alles zu Ewer Furstlichen Durchlaucht gestaldt, / wÿ dÿ selbtige nun auch ÿst ersucht worden. / Hatt sy dÿ sache weÿtter uff dÿ freuntschafft gelegt, / dÿ doch nichts anders, wÿ zuvor gemeldt, Ewer Durchlaucht wyllen nachgehenn, / hab wir nicht mugen nachlassen, hirynnen Ewer Furstliche Durchlaucht zubesuchen. / Und bÿtten gantz freuntlich und vleÿssig, / dÿ weÿl sich dÿ sache so lange, nun bis in zweÿ jhar, erstreckt hat, / Ewer Furstliche Durchlaucht wolle dem genanten theter in yrem furstenthumbe / ein christlich, freÿ, sicher geleydt ab und zu von unsern wegen leÿsten und gebennn, / uns hirynne wÿlforen / und den ungenedigen wyllen in gnaden wenden. / Das sein wir umb Ewer Furstliche Durchlaucht, in der gunst wir un[s] thun befelhen, freuntlicher weis zuvordynen geneÿgt. /

Datumm Heÿlsberg, den III Ianuarii M D XXXVIII.

Ioannes, von Gots gnaden colmischer byschoff, administrator zu Pomesan und postulirt zu Ermelandt