Dem durchlauchten, hochgebornen fursten und hern, herrn Albrechten, von Gots gnaden marggraff zu Brandenburg, / in Prewssen, zu Stethin, Pomern, der Cassuben und Wenden hertzog, burggraff zu Nurmberg und furst zu Rugen, unserm hochgunstigen, lyben hern und freundt

Durchlauchter, hochgeborner furst, hochgunstiger, lÿber her und freundt. / Unser freuntliche, wÿllige dinst zuvoran. /

Aus Ewer Furstlichen Durchlaucht schreÿben, datumm Kunsberg den XV dits monds, das wir jestrigs thags erhalthen, / hab wir Ewer Furstlichen Durchlaucht meÿnung was dÿ ratificacion koniglicher wird zu Dennemarcken uber dÿ summa gelds etc. belangt / und wÿ dÿ Ewer Furstliche Durchlaucht dem edlen, ernfesten hern danctzker castellann under hochgedachter koniglicher wird grossem insigel geantwurtt, / domit uff negster koniglicher maiestet, unseres allergnedigsten hern, rethen thagfarth / dÿ verige wider geben solde werden etc., wor ÿnne vor unser person, / auch an zweÿffel der andern hern, / nichts sol nach bleÿbenn, / domit Ewer Furstliche Durchlaucht beger und wÿllenn, / nemlich so es auch dÿ bÿllicheit furdert, / genugen muge gescheen. /

Hie beÿ, wÿ uns Ewer Furstliche Durchlaucht bericht, / das dÿ im kortzen uns etliche handlungen und schrÿfften wollen zcu stellen etc., seÿ wir erbottig, / und uns gern woln gebrawchen lassen / so weÿt unser slecht vorstandt reÿcht, / wÿlferig und gefellig zcu sein, / dan Ewer Furstliche Durchlaucht, / in der gunst wir uns befelhen, / vÿl freuntlicher dinst, / und was wir sonst der selbten zu wolgefallen tzu thunn vormugen, / seÿ wir gentzlich geflÿssen. /

Datumm Heylsberg, den XVIII April anno domini M D XXXIX.

Ioannes, von Gots gnaden bÿschoff zu Ermelandt

qui supra manu propria subscripsit