Durchlaucher, hochgeborner furst, hochgunstiger, lieber herr unnd freundt. / Unnsern freuntlichen unnd fleyswyllige dienst zuvoran. /

Wir haben negst bey unnserm kamer jungen zwey briffe, / den ersten XX, / den andren ein tag darnoch gegeben, / von Ewer furstlichen Durchlaucht erhaltenn. / Uff die selbigen ( domit wir mit langen shreyben Ewer furstlichen Durchlaucht nicht verdris machen ) wolle wir in dem, was von noten, / unnser antwurt / in die kurtze stellenn. /

Inn dem ersten hab wir gern gelesen, / das Ewer furstliche Durchlaucht die zufur von den iren in unser bischtum und herschafft nicht haben verboten, / allein teurung zuverhutten, / den alten gebreuchen noch, / iren unnderthan in Ewer furstlichen Durchlaucht herczigthum / in den negsten gelegen steten und flecken / marck zw halten befolen, / unnd was so nicht verkofft wurd / weytter zw furen zw gelossen, / daran wir kein misfallen tragen, dieweyl es under uns der gestalt auch wirt gehalten, / nemlich mit kawffmans warhe wie flachs, hoppen etc. Es ist aber im hollandischen und im balgischenn inn sunderheit, / des sich der hochwirdig von Samelanndt herre schreybt, / solch Ewer furstlichen Durchlaucht geboth, / wie aus seiner lieb oben shreÿben / uns gleichmessig / an unnser unnderthan von Bransberge zuvernemen, / das wir unns bitten widerschicken, / vil annders ausganngen / unnd uber den alten gebrauch unnd wolgehaltene gewonheyt ( wie wir von denn unnsern bericht ) Ewer furstlichen Durchlaucht dorffleuten bey schwerer straff unnd buss verboten, / das aus Ewer furstlichen Durchlaucht hertzogthum keiner in unser lannd zw marckten sol faren, / ehr habe dan von der obrigheyt ein zeychen, / das zuvor nye gewesen. / Dobey auch disse newheyt uffgesetzt ( damit der wochen marckt in unser stat Braunsberg, der im sonabent wirt besucht, / abgelegt unnd verghe ) das im Hilgenbeil / unnd Cinten auch uff den sonnobent, / der vor alweg war im freytage, / gehaltenn wurde, / des wir uns mit den unsernn vor Ewer furstliche Durchlaucht, / die in irem schreiben keine newheyt zw gestaten ahnzeigen, / nicht unbillich weys beschweren / unnd bitten abermols wie zuvor mit hochem fleis, Ewer furstliche Durchlaucht wolde aus sunder gunst, / die wir bey der zw habenn unns gentzlich versehenn, / solch bedrengm[is] aus dem balgischen uff Ewer furstlichen Durchlaucht gemeinenn paursman unnd die unnsern ahngese... abzuthun befhelen. Das wir umb Ewer furstliche Durchlaucht freundtlich zuverdinen / unnd mit gutter nutzlicher zuneigung derselbten unnderthan allenthalbenn wollen lossenn genissenn. /

Was denn edlen unnsern sonnderen freundt, herrn Achacium Czemen, dantzker castellan etc. der gestrig tags von unns gezogen, / mit seinem wyderteil zuvertragenn / unnd die copey, / die wir negst Ewer furstlichen Durchlaucht zugeschickt, / ob sich der herr castellan darzw bekent, / anghet, / wissen wir seines widersachers halben, / wie der zw dem vertrag gesinth, / nichts zw schreibenn, / dieweil wir bisher kein antwurt uff koniglich befhel, / des wir im ein abshrifft zwgeschickt, / uberkomenn. / Wes sich aber der herr dantzker castellan erbeut, / auch was er sich uff die copey erinnern kan, / wirt Ewer furstliche Durchlaucht aus seinem eigen hantshreyben, / das wir auch wider an uns zw komenn bitten, / haben zuvernemenn. /

Inn dem andren Ewer furstlichen Durchlaucht briffe, / wie auch im vorigen, / hab wir Ewer furstlichen Durchlaucht ganntz gunnstig erbittenn gen unnser person / unnd die unnsern mit sonnderem trost verstanden. / Thun unns auch des hochlich gen Ewer furstliche Durchlaucht bedanncken, / die unns, / mit Gots hülff, / nummer sol annders spurenn unnd finden, / dan wie die von uns bisher erfarenn / unnd aus unserm munde in gegenwertigheit angehort. / Wer ouch vil danncksagung in der dennischen handlung, / die wir etwan uns allen zu guth vorgestelt, / unnotig. / Was wir aber weytter wusten unnd mochten Ewer furstlichen Durchlaucht und all der verwanten / zu ehren, / nutz unnd gutter wolfhart / ausrichtenn / und wirglich zw thun, / erbitt wir uns ane boschwerde wyllig unnd mit begird geflissenn. /

Was sunst von noten uff Ewer furstlichen Durchlaucht letzst schreyben, / ist oben mit der kurtz beantwurt, / das wir bitten unns zw gutte halten / unnd derwegen sich ghen unns unnd die unnsern, / wie unnser hochgunstiger, lieber herr freundt und nachpar erzegenn unnd halten, / auch uns aus angefanngener gunst / unnd freundtschafft, / der wir unns befhelenn nicht zu lossenn. /

Datum aus unnserm schlos Heylsberg, den letzsten Iannuarii M D XL

Illustrissimae Dominationis Vestrae deditissimus Ioannes episcopus Varmiensis manu mea scripsi.