Durchlauchter, hochgeborner furst, hochgunstiger, lieber her und freundt. / Unsere freuntliche, willige dienst zuvorann. /

Es hat uns abermal Georg von Elditen, unser lieber, getreuer und burggraff, alhier uf Heylsberg dinstlich und undertheniglich von wegen Mattes von Elditen, seins bruders, angelangt und gebeten, wir wolten inen sampt seÿnem bruder an Euer Furstliche Durchlaucht / gnediglich zuvorschreiben / geruhen und zuvorbitten, / das Euer Furstliche Durchlaucht, die bisher uf unser forderung in gnanten Mathes von Elditen irrigen sachen sich in allen gnaden und gonsten hat finden, / und dieselb sach zum vorhofften ende gelangen lassen. / Nhu ist noch das testament, / so gedachtem Mattes / sein ehelich gemalh in Got vorstorben gegeben, / hinderstellig.

Ist demnach unser freuntlich bitt, Ewer Furstliche Durchlaucht wolte auch mit gnaden und gunsten / das ende beschlissen / und dasselb testament, / des abschrift hir inne bewaret, / gnediglich bestettigen / und uns solcher bestettigung ein schriftlichen schein zustellen, / domit also diese langwirige sache / ire endtschaft erlangen / und die guthen menner, unser burggraff sampt seinem bruder, was des ire ist, wissen megen. / Das wollen wir in gleichem und grossern umb Ewer Furstliche Durchlaucht freuntlich und nachbarlich, / hie auch in aller underthenigkeit irem vormogen nach, / vor dienenn. /

Datum aus Heilsperg, / den XXVII Februarii M D XL. /

Johannes, von Gots gnaden bischoff zu Ermelandt / ... supra manu propria subscripsit