GStA PK, HBA, C1 No 665, 2 unnumbered

Dem durchlauchten, hochgebornen fursten und herren, hern Albrechten, von Gots gnaden marggraff tzu Brandenburg, / in Preussen, zu Stettin, Pommern, der Cassuben und Wenden hertzog, / burggraff zu Normberg und furst zu Rugen, / unserm hochgunstigen, lieben herren und freunde /

GStA PK, HBA, C1 No 665, 1 unnumbered

Durchlauchter, hochgeborner furst, hochgunstiger, lieber her und freundt. / Unsere freuntliche und vleiswillige dinste zuvoran. /

Gestriges tages gen abent ist E(wer) F(urstlichen) D(urchlauch)t camer junge von ko(nigliche)m hoffe widder an uns kommen, / und uns von den herren canczler und under canczler uf unser schreÿben antwort bracht, / die uns anzeigen und vor gut ansehen, / das E(wer) F(urstliche) D(urchlauch)t, wie wir auch negst geschrieben, / zubesuchen ko(niglich)e m(aieste)t, unsern aller gnedigisten hern, ym wege gen Litten / nicht underlisse. / Melden aber doneben, das ir m(aieste)t bis gen der Wilne nindert im zoge uber ein nacht wirt vorharren, / wie solchs ane zweifel aus schrifften von hofe, / und was sonst do / und aus Hungarn newes ist, / E(wer) F(urstliche) D(urchlauch)t klerlicher wirt vornehmen. / Uns ist auch ein brieff von E(wer) F(urstlichen) D(urchlauch)t worden vor den edeln, ernvhesten h(ern) Friedrichen von Olsnitz, / heubeman zum Hoenstein, E(wer) F(urstliche) D(urchlauch)t obermarschalk, von wegen seiner mulhen, die er uff unserm und unsers w(irdigen) capittels halben strome zu bawen vorgenommen, / worynne wir E(wer) F(urstliche) D(urchlauch)t zugefallen gedachtem E(wer) F(urstliche) D(urchlauch)t ober marschalh, / dem wir mit sondern gunsten gewogen, / so vil uns ummer muglich und fueglich, gerne wollen forderlich sein. / Es mag aber derhalben bequemer weiss nicht eher, biss im November nach aller heÿligen tage, / uff welche zeit bei unser kirchen ein general capittel gehalten wirt, gehandelt werdenn. / Was wir zur selbten zeit uf E(wer) F(urstlichen) D(urchlauch)t vorschrifft neben unserm w(irdigen) capittel zu willen mugen ausrichten, / sal an unserm vleis nichts abgehen. / Nechten spet ist auch ein loffender bott mit E(wer) F(urstlichen) D(urchlauch)t eigen handt und anderm schreiben an uns gelangt, / bei dem wir weiter E(wer) F(urstliche) D(urchlauch)t wollen beantworten, / und haben diesen E(wer) F(urstlichen) D(urchlauch)t camerjungen, / dieweil er von ko(nigliche)m hoffe brieffe mit sich hat, nicht wollen lenger ufhalten. / Thuen uns hiemit in E(wer) F(urstlichen) D(urchlauch)t gunst vortrawlich befelhen.

Dat(um) Heylsberg, den XXIII Aprilis MDXL. /

Ioannes, von Gots gnaden bischoff zu Ermelandt. / Io(annes) e(piscopus) V(armiensis) ma(n)u p(ro)pria s(ub)s(cripsi)t adscribed, in the hand of Dantiscus⌈Io(annes) e(piscopus) V(armiensis) ma(n)u p(ro)pria s(ub)s(cripsi)tIo(annes) e(piscopus) V(armiensis) ma(n)u p(ro)pria s(ub)s(cripsi)t adscribed, in the hand of Dantiscus⌉