Durchlauchter, hochgeborner furst, hochgunstiger, lieber her und freundt. / Unsere freuntliche und vleis willige dinste zuvoran. /

Wir haben diesen tag Ewer Furstlichen Durchlaucht schreiben, / das zu Konigsberg den XXII dits / an uns ausgangen, / erhalten, / dorin uns Ewer Furstliche Durchlaucht gunstiger weis anzeigen, / wie die ersamen von Dantzk Ewer Furstlichen Durchlaucht bericht gethan, / was negst in der sachen von wegen der vorlegung des marckts von Soldaw gen Mlaua / durch die herren konigliche rethe, landt und stedte dis orts gehandelt, / und an konigliche maiestet, unsern allergnedigisten herren, geschrieben, / doneben auch, was von hochgemelter koniglichen maiestet vor antwort doruff gefallen, / von uns derhalben freuntlich begerende, / Ewer Furstliche Durchlaucht zu wolgefallen, / zu gut auch eim ersamen rathe zu Dantzke und diesenn landen, solche newheit abzuwenden / unsern vleis beÿ koniglicher maiestet wolten vorstellen / etc. Dieweil wir dan diese sache neben andern herren koniglichenn rethen uf negst gehaltener tagefart / zu Marienburg mit vleis haben an konigliche maiestet gefertigt, / entfinden wir uns schuldig, uff anforderung Ewer Furstlichen Durchlaucht dieselbte vilmehr dan vor zu solicitirn. / Wollen auch solchs mit den ersten, so unser bott von koniglichem hofe, des wir teglich warten, / widder an uns kompt, / ins werck zu setzen, so vil umer in uns ist, / nicht nachlassen, / dan Ewer Furstlichen Durchlaucht viel freuntliche dienste / und derselbten willen wirglich zuvorbrengen sein wir begirig und gevlissen.

Datum Heÿlsberg, den XXVII Julii M D XLten.

[Joannes, von Gots gnaden bischoff zu Ermelandt]