BCz, 1606, p. 136

Dem Erwirdigenn inn Got unnserm besonndernn, liebenn freundt, Hernn Iohann, erweltem bischoff zu Colmensehe etc.

BCz, 1606, p. 135

Unnser freuntliche diennst zuvor. Erwirdiger inn Got, besonnder lieber freundt. /

Unns hat der erbar, unnser heuptmann zur Mymmell, rath unnd lieber getrewer / Georg Clingennbeck verstenndigt, wie Euer Lieb sich nit allein inn unnsernn, sonnder auch aller unnser bruder sachenn ganntz gutwillig erpotenn unnd dieselbenn mit allem trewen vleys thut furdernn helffenn, / welchs unns fur war nit wenig erfreuth. Thun unns auch desselbenn ganntz gnediglichenn gegen Euer L(ieb) bedannckenn, / zweifels onn, die selb werde hinfuro das best inn unnsernn unnd unnser bruder hendelnn furwenden. /

Wollenn wir hinwidderumb auch nit unndterlassenn, / dweill dieselb nu mehr unnser nachpar, E(uer) L(ieb) allenn freuntlichenn, gutenn willenn zuertzaigenn unnd unns als der freunntlich nachpar gegenn E(uer) L(ieb) zuhaltenn. /

Datum Konigspergk, denn 12. Augustii 1530.

Vonn Gots gnadenn Albrecht, marggraff zu Brandenburg, in Preussen, zu Stettin, Pomern, der Cassuben und Wendenn hertzog, burggraff zw Nurenbergk und furst zu Rugenn