GStA PK, HBA, C1 No 807, 4v

Dem durchlauchten, hochgebornen fursten und herren, hern Albrechten, von Gots gnaden marggraff zu Brandenburg, / in Preussen, zu Stetin, Pomern, / der Cassuben und Wenden hertzog, / burggraff zu Normberg / und furst zu Rugenn, / unserm hochgunstigen, lieben herren unnd freunde

GStA PK, HBA, C1 No 807, 1r

Durchlauchter, hochgeborner furst, hochgunstiger(r), lieber her und freundt. / Unsere freuntliche unnd vleiss willige dinste zuvorn. /

Wir habenn gestrigs tags E(wer) F(urstlichen) D(urchlauch)t schreiben erhalten, / doruff wir unbeschwert koniglicher m(aieste)t, / unserm aller gnedigisten hern, / und dem hochwirdigen hern von Plotzka / under cantzler, / wie eingelegte copeien mitbringen, geschrieben, / auch des betrieglichenn gewants halben / der form und weiss nach, / wie E(wer) F(urstliche) D(urchlauch)t anzeigt, / an den hochwirdigen hern / und die ersamen von Breslaw / unser brieffe geben, / die wir bitten mit den iren zuubersenden. / Es sein uns auch im dato diese beigelegte von hoffe an E(wer) F(urstlichen) D(urchlauch)t zukommen, / die wir hiebei zuschicken / mit erbietung, wo wir der freuntlich dienen, / ehre und nutz furdern mugen, / vordan und allwegen gantz willig zusein und geflissen. /

Dat(um) Heilsberg, XVI Novembris 1541. /

Ioannes, von Gots gnaden bischoff zu Ermelandt /

ma(n)u p(ro)pria s(ub)s(cripsi)t