Dem durchlauchten, hochgebornen fursten und herren, hern Albrechten, von Gots gnadenn marggraffen zu Brandenburg, / in Preussenn, zu Stetin, / Pomern, / der Cassuben und Wenden hertzog, / burggraffen zu Normberg / und fursten zu Rugen, / unserm hochgunstigen, lieben herren unnd freunnde /

Durchlauchter, hochgeborner furst, hochgunstiger, lieber her und freundt. / Unsere freuntliche und vleiswillige dinste zuvoran. /

Aus Ewer Furstlichen Durchlaucht schreiben und der eingeschlosnen copeien koniglichs brieffs an Ewer Furstliche Durchlaucht hab wir vorstanden, / das der grenntz handel mit dem furstenthumb Litten / nichts sich will endern, / derwegen wir auch uff der meinung, / die wir mit dem edlen, ernfesten, u[nd] hochgelarten hern Johan von Creitzen, beider recht doctor, Ewer Furstlichen Durchlaucht rath und cantzler, beredt / unnd unserm einfalt nach an Ewer Furstliche Durchlaucht zubringen / mitgegeben, / beruhen. /

Uff welche zeit aber der gemein reichstag in der Cronen sol gehalten werden, / sein wir schriftlich bericht, / das solcher tag bis nach ostern ist vorlegt / und keine gewisse zeitt angesetzt. / Es wirt dobei geschrieben, das konigliche maiestet, unser allergnedigster her, in eigner person dorzu kommen sol. /

Wir warten auch alle stunden von dem hochwirdigen hern Luca bischoffen zur Coya hirinnen antwort. / An sein lieb hab wir vor siebenzehen tagen von hynnen unsern camer jungen gesendt. / Was der widder an uns wirt mithaben, / wollen wir Ewer Furstlichen Durchlaucht, der wir gern freuntlich dienen / und zu willen sein, / nicht vorhalten. /

Datum Heilsberg, den XVII Februarii M D XLII.

Ioannes, von Gots gnaden bischoff zu Ermelandt /