GStA PK, HBA, C1, No. 943, 2unnumbered

Dem durchlauchtigen, hochgebornen fursten und herren, hern Albrechten, von Gots gnaden marggraffen zu Brandenburg, / in Preussen, / zu Stettin, Pommern, / der Cassuben und Wenden hertzogen, burggraffen zu Nurmberg und fursten zu Rugen, / unserm hochgunstigen, lieben herren und freunde /

GStA PK, HBA, C1, No. 943, 1unnumbered

Durchlauchtiger, hochgeborner furst, hochgunstiger, lieber her und freundt. / Unsere freuntliche und vleiswillige dienste zuvoran. /

Es hat uns der hochgelert doctor Hyeronimus, stadtartzt unnd burger zu Thorn, / dem wir mit gefatterschafft / vorwanndt, / vor seinen sohn Hieronimum, / ein geschickten und nicht ungelarten jungling, / uffs vleissigt gebethen, / weil Euer F(urstliche) D(urchlauch)t sonst anndere junge leut zu Leiptzig in iren kosten zur lernung thut halten / und mit notturfft vorsorgen, / denselbten seinen sohn E(uer) F(urstliche) D(urchlauch)t in die zahl / und bekostunge solcher studenten zubevelhen, / derwegen wir freuntlich bitten, gemelten jungling wolde annemen / und gen Leiptzig zu den andern vorschreiben lassen, / welchs er, so im Gott in gesundtheit zu volkomner lehre geholffen, ane ablassen mit seinen underthenigen / und wir mit freuntlichen diensten umb E(uer) F(urstliche) D(urchlauch)t zuvordienen / schuldig und willigk wollen gefunden werdenn. /

Dat(um) Heylsberg, den XXV Novembris M D XLIII. /

Ioannes, von Gottes gnaden bischoff zu Ermlandt /