Dem durchlauchtigen hochgebornen furstenn und herren hern Albrechten von Gottes gnaden marggraffen zu Brandenburg / in Preussen / zu Stettin / Pommern / der Cassuben und Wendenn hertzogen burggraffen zu Normberg und fursten zu Rugen / unserm hochgunstigen liebenn herren und freunde

Durchlauchtiger hochgeborner furst / hochgunstiger lieber her und freundt. / Unsere freuntliche und vleis willige dienste zuvoran. /

Uns ist heutigs tags / Euer Furstlichen Durchlaucht schreiben bei diesem boten / den XXII dits aus Konigsberg datirt / geworden / domit Euer Furstliche Durchlaucht von uns freuntlich fordern / weil der durchlaucht hochgeborn furst und her her Albrecht der junger marggraff zu Brandenburg etc. hertzog in Preussen / Euer Furstlichen Durchlaucht freuntlicher lieber vetter / und unser hochgunstiger lieber her und freundt / des wegs nach dantzschen landen uf Elbing und Marienburg sich zubegeben vorgenommen / und das schlos Marienburg zubesichtigen begirig / das wir bei den bevelhabern des schlosses thetten anhalden / das hochgemeltem fursten das schlos zubesichtigenn / wir einem lehenfursten koniglicher majestet unsers allergnedigsten herren wurd zugelassen / welchs wir mit beigelegtem brieffe an den erbarn ernfesten Albrecht Grabski underheuptman des gnanten schlosses mit sonderm vleis haben angestelt / der zuvorsicht das gemelter underheuptman uff unser shreiben sich wilferig werde erzeigen / worinne wir sonst Euer Furstlichen Durchlaucht und derselben freuntlichem lieben vettern / unserm hochgunstigen lieben herren und freunde / vil freuntliche und angenehme dienste vormügen beweisen / sein wir willig und erbottig. /

Wunshen doneben dem hochgedachten hern jungern marggraffen zu Brandenburg etc. hertzog in Preussen / mit erbietung unser freuntlichen willigen dienste / in gotlichen gnaden / mitlangweriger leibs gesuntheit / und aller selickeit / ein gluckliche heimfart / und thun uns auch hiemit euern beiden Furstlichen Durchlauchten freuntlich / und mit sonderm gneigten gemuet dienstlich bevelhen. /

Datum Heilsberg den XXIIII Februarii M D XLV.

Ioannes von Gottes gnaden bischoff zu Ermlanndt / qui supra manu propria subscripsit