GStAPK, HBA, C1, No. 1102, f. 3unnumbered

Dem durchlauchten hochgebornen fursten und herrnn herren Albrechten von Gots gnaden marggraven zu Brandenburg in Preussen / zu Stettin Pomern der Cassubenn und Wenden hertzog / burggraff zu Normberg und furst zu Rugenn / unnserm hochgunstigen lieben herrn und freundt

GStAPK, HBA, C1, No. 1102, f. 1unnumbered

Durchlauchter hochgeborner furst hochgunstiger lieber herr unnd freunndt. / Unnsere freunntliche unnd vleisswillige dinste zuvornn. /

Wir habenn genugsam eingenomenn / was unns E(uer) F(urstliche) D(urchlauch)t vonn des deutschen meisters vornemen / mit abfertigunng der mortbrenner in diese lannde / zugeschribenn / unnd thun unns freunntlich kegen E(uer) F(urstliche) D(urchlauch)t das unns die hierinn vorwarnen bedannckenn. / Wollenn auch in unnserm bistumb bey allen unnsern amptleutten unnd vorwesenden personen / gleicher gestalt / wie von E(uer) F(urstlichen) D(urchlauch)t in ihrem herczogthumb gescheenn / fleissige bestellunng vorschaffenn / damit auf alle umbreisende personen gut acht gebenn werde / unnd wo dergleichen abgerichte leuth diesen lannden schaden zuczufugenn / bekommen / wollenn wir E(uer) F(urstlichen) D(urchlauch)t davonn / meldung zuthun / nicht nachlassenn / auch diese dinnge weyther auf negstkommende tagfarth Michaelis zu Graudentz an die anndern stennde unnd koniglichenn redte / worzu E(uer) F(urstliche) D(urchlauch)t radtenn brinngenn / auf das dieser koniglicher orth / allennthalbenn darin vorwarnet / unnd solchem hynnlichen schaden / davor sich ubel zuhuttenn / abgewendet unnd dem furkomen muge werdenn. / Thunhiemit E(uer) F(urstliche) D(urchlauch)t die wir freunntlich bittenn unns mit gewonlicher nachparlicher gunnst zuvorvolgen / dem GStAPK, HBA, C1, No. 1102, f. 2unnumbered allmechtigen Got / mit lanngweriger gesunndtheit unnd gelucklicher regirunng bevelenn. /

Datum Heilsberg, III Septembris M D XLVII.

Ioannes von Gots gnaden bischoff zu Ermeland etc.