Dem durchlauchtenn, hochgebornenn furstenn und hern, / [hern] [Albre]cht, marggraffenn [zcw] [Brand]enburg etc. unnd herczogen inn Prewssenn, / meÿnem freuntlichen, lieben hernn /

Durchlauchter, hochgeborner furst, / fruntlicher liber her. / Meÿnn freuntliche, willige dienste zcuvoran. /

Mir sein Ewer Irbarkeit briffe nebenn koniglicher maiestet, meins allergnedigsten hernn, commission vor dreÿen tagenn wurdenn, / welcher innehalt ich vorstanden. / Wil mich gerne Ewer Irbarkeit beger unnd willenn noch haltenn, / idoch woldt ich vil lieber, das ein vorstendiger zcw solchenn sachenn, / die greniczen unnd dergleichenn angehen, / inn meÿne stelle wer benumpt. / Auch wil ich solchenn Ewer Irbarkeit brieff mit der commission an andere hernn, darinnenn benent, / lossenn gelangen / und mich gerne, / wie bisher gethan, / sovil mir mugelich / noch Ewer Irbarkeit willenn haltenn. /

Gerne het ich gesehnn, das mein besunder gutter bruder, der her Nÿbschicz, inn beredung mith Ewer Irbarkeit wer zcwsamne kommen, / der meÿn / unnd meÿner armenn leuth sache beÿ Ewer Irbarkeit het thun furdernn. / So das nicht geschicht, / bitt ich Ewer Irbarkeit mit hoem fleisz, mitleidenn habend unsers feurschadens, / domit uns Gott der allemechtige von unser sundt wegenn schwerlich gestrofft, / wolt mir mit meÿnenn armen leuttenn so guttig erscheinenn / unnd uns zcwgebenn / unnd gunstiglich zcwlossenn / czÿmmer unnd bawholcz in osterrodischen unnd eÿlischenn weldenn unnd heidenn zcwhawen, / das ich mit denn meÿnenn alleczeit zcw vorschulden unnd vordinenn wil geflissenn sein / unnd Gott gebe nummer vonnotenn seÿ inn gleichem fhal solches zcuvorgeldenn. /

Hiemit wunsche ich Ewer Irbarkeit vonn Gotte dem allemechtigenn inn langkweriger gesuntheit unnd gelugkseligem zcwnhemenn / vil gutter czeit / unnd bitt, woldt mein fruntlicher, gunstiger her bleibenn. /

Datum uffm slosse Lebaw, / den 2 tag Julÿ 1533.

Ewer Irbarkeit williger

Joannes, bischoff zu Culmen manu propria