Dem durchlauchten, hochgebornen fursten und hern, hern Albrechten, marggraffen zw Brandenburgk etc. und herczog in Prewssen, / unserm gunstigen, lieben hern und frunde /

Durchlauchter, hochgeborner furst, gunstiger, lieber her unnd frundt. / Unsere fruntliche dienst und was wir sunst vil liebs und wolgefallens vormugen zuvoran. /

Hiemit schicke wir Ewer Irbarkeit antwurt von unserm liebenn hern und freunde, dem hern bischoffe von Krako, / aus der copei des artikels / Ewr Irbarkeit beger betreffend. / Was Ewr Irbarkeit weiter von uns hir inne wirt furdren und wie Ewr Irbarkeit zw willen mugen sein, / erbitt wir uns willig. /

Was newer czeitung an uns sein gelangt, / hab wir hie beÿ lossen legen. / Hot Ewr Irbarkeit ouch dergleichen, / wolde uns die selbige mitteilen / und lossen wissen, ab aus dem zwsamne kommen zw Posen was sol werden / oder wie lange vorlegt etc.

Uns hot ouch nicht wenig erfreuet, / das die sache mit Fasoldt hin ist gelegt. / Got der almechtig, / dem wir Ewr Irbarkeit in langweriger gesuntheit und glugkseligem zwnhemen und regirung thun befhelen, / gebe uns in seiner gnade fried zw unsern tagen.

Datum aus unserm slosse Lobaw, 4. Septembris anno domini 1534.

Ioannes, von Gots gnaden bischoff zw Culmenn, administrator des bischtumbs Pomezan