Dem durchlauchten, hochgebornen fursten und hern, hern ⌊Albrecht⌋, von Gots gnaden marggraff zu ⌊Brandenburg⌋ etc. und hertzog in ⌊Preussen⌋ etc. unserm hochgunstigen hernn und freunde /
Durchlauchter, hochgeborner furst, hochgunstiger, vilgeliebter her und freundt. / Unser freuntliche, wÿllige dinst zuvoran. /
So wir von dyser sworen reysse von den gnaden Gottes mit den unsern wider umb gesundt anheim sein gelangt, / hab wir gefunden unsers burggraffen freunde mit namen ⌊Mattis Hans⌋ und ⌊Kilian Gindlowski⌋, / welche sich gen Ewer Furstliche Durchlaucht aus irem unvorstandt nicht recht gehalden, wÿ sichs wol geburt. / Dyweÿl nun ytzundt in dÿsen heylligen getzeytten sich zcimett vor arme, unvorstendige lewtte zu bytten, / und wir mher noch unserm stande, den ein ander, solchs zu thun schuldig, / derhalben unser freuntlich bit, Ewer Furstlichen Durchlaucht wolle solchen armen lewten genediglich erscheynnen / und das selbtige ÿrem unvorstandt zu messen, / sy unser vorschrÿfft lassen geniessen / und dy ungnad, so Ewer Furstliche Durchlaucht uff sy geworffennn, zu gnaden wenden. / Das wollen wir umb Ewer Furstliche Durchlaucht, der wir vil lybs und freuntlichs dinst schuldig sein, wyllig und gerne vordienen, in der gunst wir uns thun befelhen. /
Datum aus unserm slos ⌊Lobaw⌋, XIIII Marci M D XXXVII.
⌊Ioannes⌋, von Gots gnaden colmischer bÿschoff, administrator des ⌊byschtumbs Pomesann⌋
