Dem erwirdigen in Got, unserm besondern lieben freundt unnd nachbarn, herrn Johansenn bischoffen zu Ermlandt

Hochwirdiger in Got, besunder lieber Her und Freund.

Euer Lieb sei mein freuntwillige dinst und wes ich mer liebs und gutes fermag zuvor.

Ich hab Euer Lieb fertrewlich schreiben mit eigner hant an mich ausgangen entpfanngen inhaltz gelesen und eingenumen thu mich demnach, das dyselb so fiel muhe und arweit von niemant wegen / auff sich nemen, mir auch so cristlich und herczlich wunschen und von Got dem almechtigen pitten mit anhafft, was dy selb bey koniglicher maiestet, meinen allergnedigsten herrn und freuntlichen lieben ohem, dergleichen auch Euer Lieb hern und freunden, meiner und meiner sachen in allen eren und zu guten gedencken wollen und mir fertrewlichen raten zumb bessten freuntlich und nachparlich bedancken und wunsch Euer Lieb hinwiderumb von Got dem almechtigen nicht weniger gnad, frid, wolfart und ewiges gedey beides zu sel und zu leib wil auch in allem dem das zu aufwasche Euer Lieb gereichen und kumen mag also wy vylfeltig erpoten finden lassen und nachdem Euer Lieb mir nochmals trewhercziglich dar fur ichs auch ferstehe auf und anneme ratten thut, das ich mich mit hochbenanter koniglicher maiestet sehen wolt mit erzelung war zu es gut und was disfals wol ehemals durch andere geschehen etc.

Kan ich denselben beihen bedencken nit abfallen. Aber es halten mich von solchen ab das nun mer ire konigliche maiestet auff dem wege zu treffen und zufinden fast unmoglich zu dem das dy hendel, welche verhanden und am hi mol sorglich aufgezogen nun mer in dy lenge sich nit halten kunnen sy mussen eins mols herfur brechen und kumen derselben ausgangk alhie ynner landes zu erwarten ich vor unnotig ansehen nit kan. Aber wy dem allen so wil ich, das alles bey mir weiter erwegen und so sich fug und bequemichkeit koniglicher maiestet, meinen gnedigen hern, zubesuchen zutragen wollen auch dise hofnung sich schicken thun das durch dis mein reisen gemeynen landen und leuten gedinet und was gutes gefordert und geschaffen werden kunte, wil ich mich darin gancz nichtes besweren, sunder der gestalt wy Euer Lieb geraten auf mich gutwillig nemen. Wo es aber geschehen solt, wil ich ane Euer Lieb weiter vorwissen hir in nichts furnomen und sich lissen. / Das bey koniglicher maiestet ene geschlecht leut seint, welche des heiligen und frumben konigs hercz und gemute zu zeitten hin und her furen etc.

Hab ich nie gerne ferstanden aber do kann ich nichts mer dar zu thun den, das es mir leit ist ire konigliche maiestet in solchem grossen loblichen alter des ruhe, frid und frolichkeit sucht und begert mit solchem nit forschont sunder fielfeltig beschwert werden sal. Ich pit Got er wol als der gewer alles guten geburende mittel von den dy si erfrewen sollen gewen und schaffen domit sein maiestet nit bevurnhet ader mit schmerczen beladen auch das gefordert, das zu nutz ere und wolfart der konigreich land und leuten dinstlich und vorderlich sein mag.

Zu welchem allem so ich fur mein person etwas fordern kann, ich mich schuldig erkenne und willig finden wil lassen pitte Euer Lieb, dy ich hiemit in den schucz des ewigen Go[ts] thu befelen wol in diser ehe und mit meiner posen ha[nt] schriff und wes ruhen dinte fur gut nemen den es ...lich gantz eilends wy ich in dy ret gehen sollen verse... und wollen mir ein gros bot sein meinen geliebten f[reunt] von Kolmansehe mein freuntliche dinst und alles gut ... sagen und wunschen mich auch aus Euer Lieb gunst, lieb u[nd] freuntschafft nit lassen.

Datum gantz eilend, Kunigspurgk, den 12 Maii anno 1540.

Euer Lieb gantz freuntwilliger Abrecht, marggraff in Preussen, herczog etc.