Letter #5666
Paweł PŁOTOWSKI to Ioannes DANTISCUSFrauenburg (Frombork), 1539-05-07
| received [1539]-05-09 Manuscript sources:
Auxiliary sources:
| ||||||
Text & apparatus & commentaryPlain textText & commentaryText & apparatus
Reverendissimo in Christo Patri et Domino, domino Ioanni Dei gratia episcopo Warmiensi, domino et benefactori modis omnibus colendissimo
Reverendissime et Christo Pater et Domine, domine colendissime, benefactor modis omnibus clementissime.
Post officiosissimam mei commendationem.
Ingentes gratias ago et habeo Reverendissimae Paternitati Vestrae pro litteris ad me datis et unguento pro podagra promisso. Exspecto aliam instructionem Reverendissimae Paternitatis Vestrae, ubi et quando comitiae(!) transpositae(!) celebrabuntur, et quando sacra maiestas scripserit, et nuntius redierit, ubi spero et ad me litteras futuras, velit me certiorem reddere, enixe precor. Avisassem Reverendissimam Paternitatem Vestram hoc tempore, nisi festum Ascensionis et hebdomada mea non impedivisset, tamen auxiliante Domino Deo absoluto festo Ascensionis Domini in crastino feria sexta exibo ad Reverendissimam Paternitatem Vestram. Si quid tamen interim a sacra maiestate acceperit, non gravetur me certum reddere oro.
Et valeat diu et felicissime Reverendissima Paternitas Vestra meque suum perpetuum servitorem non obliviscatur.
Datum Warmiae, 7 die Mai anno Domini 1539.
Eiusdem Reverendissimae Paternitatis Vestrae addictissimus servitor et capellanus Paulus Plothowski praepositus et canonicus Warmiensis
Postscript:
Nescio quid agitur, Reverendissime mi Domine, quod frater meus Nicolaus admonet me pro cornibus venaticis tribus. Quas ego numquam accepi nec vidi, impingitque mihi litteris suis fraudem, quod litteras suas aperuissem, et furtum, quod cornua sua accepissem. Utriusque rei sum nescius et sinistre accusor. Reverendissima Paternitas Vestra velit mihi, praeposito suo, iustitiam facere, cum eum scio servitorem Reverendissimae Paternitatis Vestrae etc.
Parcat, quod similia scribo, scio enim Reverendissimam Paternitatem Vestram magnis et arduis negotiis occupatissimam, iocos tamen honestos necesse est aliquando immiscere. Sunt mihi nonnulla commissa a venerabili capitulo ad Reverendissimam Paternitatem Vestram de lino per Brunsbergenses accepto etc.