Letter #6095
Mauritius FERBER to Ioannes DANTISCUSHeilsberg (Lidzbark Warmiński), 1535-06-28
| received [1535]-06-29 Manuscript sources:
Auxiliary sources:
| ||||||
Text & apparatus & commentaryPlain textText & commentaryText & apparatus
Reverendissimo in Christo Patri et Domino, domino Ioanni Dei gratia episcopo Culmensi, amico et fratri plurimum observando
Reverendissime in Christo Pater et Domine.
Cum mei sincera recommendatione longaevam in Domino prosperitatem et salutem.
Heri quidam civis Koningsbergensis has his inclusas mihi nomine sororis Vestrae Reverendissimae Dominationis [litteras] ...signavit summo opere rogans me, quatenus, quia alicuius essent importantiae, eas ad manus Reverendissimae Dominationis Vestrae destinare vellem, quod hoc nuntio meo proprio facio. Si quid in eis novi exstet et in illis regiis litteris, quas nuper Vestrae Reverendissimae Dominationis servitor secum portavit, quod me[a] scire interest et refert, quia reverendissimus episcopus Primisliensis parum nobis scripsit, referens se ad litteras dominorum consiliariorum, mihi impertiri dignetur Reverendissima Dominatio Vestra. Cui mutuum offerente occasione libenter reponam.
Lubicenses terra et mari profligatos esse e Gdano Vestram Reverendissimam Dominationem didicisse haud dubito. Hoc novum maiestati regiae proprio nuntio scripsi.
Vestram Reverendissimam Dominationem in longos vitae annos incolumem et me sibi commendatissimum esse cupio.
Ex arce Helsberg, 28 Iunii 1535.
Reverendissimae Dominationis Vestrae bonus frater Mauritius episcopus Varmiensis manu sua
Postscript:
Reverendissime Domine.
Dominus Culmensis castellanus a me desiderat, si ipse non ivero ad nuptias, tres equos accomodari sibi. Regia maiestas iunior, ut nuntius mihi retulit, postulabit duos meliores, quibus utor pro equitio. Regio desiderio non reluctabor, modo indicet et id a me postulet, quod non magis in aliena quam mea sit potestate, modo solum pro pecunia venales tales vel similes habere valerem.
Si essem iunior vel saltem valentior, nequaquam absentarem me a tali nuptiarum celebritate rogatus.
Has litteras quidam secum fert in Hovensten, exinde in Loboviam destinaturas.
Tremula manus erronee congerit litteras et nimirum, quia universa membra ferme tremunt et vacillant.
Datae ut in litteris.