Den ersamen, nhamhafftigen hernn ⌊burgermeyster und radtmane der koniglichen stadt Elbing⌋, / unnsern gunstigen freunden
Unnsern freuntlichen grus und alles guthn tzuvoran. /
Erssame, namhaftige hern, gunstige freunde. /
Wir haben gestriges thags Ewer Erbarkeit ⌊⌋ erhalthen und gerne gelessenn, / doraus uns Ewer Erbarkeit meynung gefallen / und uns auch des vorschobs tzu gebrauchen vorgenohmen, / domit der ⌊hern landt und stet⌋ hendel und entschlossne rethe nicht sso vorachtlich hingeworffen etc.
Das schreyben an ⌊konigliche maiestet⌋, unsern allergnedigsten hern, / sso das mit dem ersten geschehe, / were der sachen nicht unnutzlich, mit dar ein gebracht die botschaft, / der nicht eyne an die hern gelangt, / uff was weyse ins erst von koniglicher maiestet die zceyse gefurdert, / welche Ewer Erbarkeit ane tzweyfel schriftlich bey sych haben. / Wyr haben der wegen weytlofftig an hoff geschryben, / warthen theglich unsers bothen und antwurts. / Wye wir das uberkomen, / wolle wirs Ewer Erbarkeit, die wyr Gothe in sein gnad befelhen, / vortrawlicher meynunge myttheylen und nicht vorhalthen, / doruff zu warthen / sey dem schreyben an konigliche maiestet kein vortzog. /
