BCz, 1596, p. 638

Dem Erwirdigen in Got, unserm besondern Lieben Freundt und Nachbarn, hern Johansen bischoffen zu Ermlant

BCz, 1596, p. 637

Unnsere freuntliche dinst zuvorn. /

Erwirdiger in Got, besonder Lyeber Freundt unnd Nachbar. /

Wir haben den erenvhesten achtbarn und hochgelerthen unsern cantzler, rathe unnd lieben getreuen, Johan von Creitzen, beder rechten doctoren, etliche gewerbe von unnserntwegen ahn E(uer) L(ieb) wie dieselb ferner von ime einzunemen / zutragen abgefertigt. / Ist damnach unsere freuntliche bithe E(uer) L(ieb) geruchen berurthem unnserm cantzler seines werbens halben gutwillige audientz unnd auff dismahl gleich uns selbst volkhommen glauben zwgeben. / Nichtsminder sych darauff unnserm hohen vortrauen nach freuntlich unnd nachbarlich ertzeigen. Das sein wir umb E(uer) L(ieb) mit nachbarlicher freuntschafft zuvordinen urputigk unnd thun damit E(uer) L(ieb) in den gewaltigenn schucz Gots bevelh(en).

Dat(um) auff unnserm haus Aaris, den ersten Octobris anno 1541.

Von Gots gnaden Albrecht marggraf zu Brandenburgk, zu Preussen, zu Stettin, Pomern, der Cassuben unnd Wenden hertzogk, burggraff zu Nurenburgk und furst zu Rugen etc. manu propria subscripsit