Reverendissimo in Christo patri et domino, domino Ioanni, Dei gratia episcopo Culmensi, serenissimi principis ... in aula cae[saris] oratori fau[tori gratioso] atque honorandissim[o]

Reverendissime in Christo pater et domine, domine fautor gratiose ac modis omnibus honorandissime. Post obsequentis animi et paratissimae operae officiosam sedulamque commendationem praemissam.

Magnificus dominus Laurentius Myschkowski filium suum praesentium exhibitorem istic ad aulam caesareae maiestatis famulatum mittit, qui mihi est vinculo sanguinis, puta ex sorore patruele, coniunctus et quem in loco genuini filii habeo, cui ut pater nativus filio quam optime consultum cuperem. Hunc itaque inter ceteros, qui suas ad Vestram Reverendissimam Dominationem dederunt intercessorias litteras, Vestrae Reverendissimae Dominationi diligenter commendo ac magnopere rogo, dignetur eum Vestra Reverendissima Dominatio in gratiam suam suscipere et benigne tractando curam illius agere, atque de manibus suis in servitium tradere, uti ex petitionibus et litteris patris eius latius accipiet Vestra Reverendissima Dominatio. Confido in gratia Vestrae Reverendissimae Dominationis, aliorum intercessorum et meae petitionis causa id Vestram Reverendissimam Dominationem facturam. Quod ego una cum parente eius Vestrae Reverendissimae Dominationi mereri omni studio obsequii volo, ad datamque occasionem, ubi et quando Vestra Reverendissima Dominatio iubere dignabitur, reservire pro viribus studebo.

Cum his me et servitia mea Vestrae Reverendissimae Dominationi studiose commendo, quam optime ac diutissime valere precor.

Datum Cracoviae, die Dominico in crastino sanctae Mariae Magdalenae anno Domini 1531.

Eiusdem Vestrae Reverendissimae Dominationis servitor Andreas comes de Thanczin, palatinus Cracoviensis