Dilecto filio Ioanni Dantisco electo Culmensi

Clemens Papa Pontifex VII

Dilecte fili, salutem et apostolicam benedictionem etc.

Meritis tuae devotionis inducimur, ut petitionibus tuis, quantum cum Deo possumus, favorabiliter annuamus.

Cum alias postquam nos ecclesiae Culmensi, tunc certo modo pastoris solatio destitutae, de persona tua de venerabilium fratrum nostrorum consilio per quasdam sub plumbo expeditas providendum duxeramus, praeficiendo te illi in episcopum et pastorem, tibi, ut usque ad unum annum tunc proxime futurum a fine temporis de consecrandis episcopis a canonibus definiti computandum munus consecrationis suscipere minime tenereris, nec ad id a quoquam invitus compelli posses, per alias in forma brevis litteras indulserimus, prout in litteris ipsis plenius continetur. Et sicut exponi nobis nuper fecisti, tu, qui, ut asseris, pro carissimo in Christo filio nostro Sigismundo, Poloniae rege illustri, apud carissimum etiam in Christo filium nostrum Carolum Romanorum imperatorem semper Augustum orator destinatus, et circa ardua negotia tam ipsum Sigismundum regem, quam orthodoxam fidem concernentia apud ipsum Carolum imperatorem non parum praepeditus exsistis, munus ipsum infra dictum annum, cuius finis, ut etiam asseris, de proximo instare dignoscitur, suscipere commode posse non speres: Nos commodis tuis in praemissis per amplius consulere volentes, tuis in hac parte supplicationibus inclinati, annum praefatum, infra quem, ut asseris, adhuc existis, ad alium annum a fine primo dicti anni computandum, quo durante munus consecrationis huiusmodi suscipere minime tenearis, nec ad id a quoquam invitus compelli possis, praemissis ac Lateranensis Concilii et quibusvis aliis constitutionibus et ordinationibus apostolicis, nec non dictae ecclesiae etiam iuramento, confirmatione apostolica vel quavis firmitate alia roboratis statutis et consuetudinibus, ceterisque contrariis quibuscumque nequaquam obstantibus, auctoritate apostolica tenore praesentium prorogamus et extendimus.

Datae Romae etc., die prima Decembris 1531, pontificatus nostri anno nono

Evangelista