Reverendissimo Domino, domino Iohanni Dantisco, Dei gratia episcopo Culmensi ac serenissimi regis Poloniae apud caesaream maiestatem oratori etc., domino suo colendissimo.

Gnediger her.

Mein gantz willig dienst sey E G zu allerzeytt berait.

Gnediger her.

Ich hab E G am 18 tag Februarii geschribnn, was noth was, under andermm meldt ich, das faslin halbnn mit der schaubnn, das ich es gen Franckfort an Gastel Fugger gesandt hatt mit Iheronimus Kiegelsz furleythen. Also haben die haylosen leyt das faslin zu Presla abgelegt vnd nicht hinausz gefiert. Ist ain ybel ding, ich kan im nicht thun. Hans Puchler hat es seyder von Presla ausz gen Nurenberg gesandt an Gastel Fugger, dem wirdt E G befelhnn, wem er es weyter sol yberantwurten.

Gnediger her.

Vor 3 tagnn ist mir ain brieff von E G wordnn des datum primo Martii in Anttorff und darbey ain brieff von her Hainrich von Resz, meldt E G der 200 ducaten halben, die zal ich derselben Katharina zu danck. Ich wolt sy ir von stund an angesicht des brieffs geben. [...] vermaint sy, wan sy der bederfft, wolt sy sy wol bey mir findnn. Das wirdt also geschehen. Sy sol zu gutten danck entricht werden, dan nicht allain in disem, sonder in allmm, womit ich E G kan ze dienst sein, findt mich E G alzeytt willig. Ich verhoff, E G wirdt nun teglich alhieher zu uns komen. darmit hab ich mich in E G gunst befolhen und Gott mit uns allen, amen.

Datum Cracoviae, 28 Aprilis 1532.

E G gut williger Jörg Hegel