» CORPUS of Ioannes Dantiscus' Texts & Correspondence
Copyright © Laboratory for Source Editing and Digital Humanities AL UW

All Rights Reserved. No part of this publication may be reproduced or transmitted in any form or by any means, electronic or mechanical, including photocopy, recording or any other information storage and retrieval system, without prior permission in writing from the publisher.

Letter #864

Jan CHOJEŃSKI to Ioannes DANTISCUS
Cracow, 1532-12-18


Manuscript sources:
1fair copy in Latin, autograph, AAWO, AB, D. 67, f. 159

Auxiliary sources:
1register in Polish, 20th-century, B. PAU-PAN, 8247 (TK 9), f. 183

 

Text & apparatus & commentaryPlain textText & commentaryText & apparatus

 

Reverendissimo Domino, domino Ioanni, Dei gratia episcopo Culmensi domino et amico observando.

Reverendissime Domine, domine mi observandissime.

Cum subito abiret is nuntius, non potui more meo longus esse. Mitto Vestrae Reverendissimae Dominationi litteras Cornelii nostri, qui in aula regis Romanorum cum nostro Nipschicz convenit. Ex cuius litteris uti existimo intelleget Vestra Reverendissima Dominatio, quam feliciter cessit Andreae de Aurea adversus Turcas, quibus ademit Coronam, Patras, Castrum Novum et alia quaedam. Mercatores nostri affirmant et Modonam captam esse, Deus reliqua secundet.

Dominus Nipschicz sperat regem Ferdinandum missurum nuntios ad tractandum concordiam cum adversario suo in aula serenissimi regis nostri. Utinam felicius cedat, quam annis superioribus.

De domino Opalenski, qui ad Turcam est missus, nihil dum scimus. Valachus iterum hostilia minatur nobis, serenissimi principes nostri ad conventum Petrkoviam proficiscentur, accepi illustrem dominum ducem Prussiae illuc quoque venturum, qui ita animum suum instituisse dicitur, ut aliquid agat contra statum ecclesiasticorum, quamvis apud me credibile non videtur. Risimus hic episcoporum ipsius vesanam mentem, qua sine lege, sine ratione sumunt sibi imperium et iurisdictionem in Dominatione Vestra Reverendissima eiusque dioecesi utque illorum displicuit audacia, ita summe placuit Vestrae Reveredissimae Dominationis responsum, quod et maiestas et probavit, et dixit non esse mutum , verum domino duci non loquebatur, quod obturatas aures habeat ad veritatis vocem.

Valeat felix Vestra Reverendissima Dominatio.

Datae Cracoviae, XVIII Decem[bris] MDXXXII-o.

Vestrae Reverendissimae Dominationis totus episcopus Premisliensis scripsit etc.