Dem erwirdigsten in / Goth Hern, / hern Johanni von Gots genaden, / des loblichen stichts Culmen bisschoff etc. / unszerm genedigen herren.

Erwirdigster in / Goth, / genediger herre. /

Unser boreidtwillige und g <e> flissene dinste / szeint Ewer Gnaden / allewege bevoran entpholen. /

Genediger herre. /

Ewer Gnaden brieff / ufm schlosse Lobaw / am vierden Iulii / gegeben / haben wir / mit zcimlicher reverentz entphangen / und den inhalt / mit beschwerten gemutte / vorleszende / eingenommen / und mussen (Eeimes Goth) lawterer mehnunge / der ergangenen fewers, / strof, schmertz und grosze mitleidunge tragen. / Goth der Almechtige welde dys leyth / in gelugselige wolfart und frewde (des wir Ewer Gnaden von hertzen wunschen und gonnen) geruchen zu wandelen. /

Was wir aber, Genediger Herre, / Ewer Gnaden hier bey uns / in seinem vaterlande seinde / zcun ehren / bewisen / haben wir dasselbige / mith unsern geflissenen und angenehmigen dinsten / williglich und gerne gethoen. / Wolde Goth, / so wir mehr wolgefallens / aws zcugetanem unserm gemute Ewer Gnaden hetten ertzeiget / sulde uns zcur beszundern frewde galangen. / Dan es wel Ewer Gnade zu uns der ungeczweifelten und trostlichen zcuvorsicht sein, / wo wir / mith unsern krefften Ewer Gnaden wilfehrig unde angenehmigk <eit> sein konnen ader mogen / sal an uns / kein fleis, / muhe / ader arbeit / hintergelossen werden. /

Mith hulffe des Almechtigen / deme wir Ewer Gnaden lange geszunth mith vormehrunge vil gelugszeligen zcunehmens / mit fleis / befehlen. /

Datum Dantzig, am VIII-ten Iulii / anno etc. 33. /

Ewer Gnaden dinstwillige und unvordrossene burgermeister und rathman der stadt Dantczigk