Religiosi Fratres nobis in Christo dilecti. Salutem in Domino.

Arbitramur vobis non esse incognitum, quibus modis schola domus et conventus vestri in civitate nostra Culmensi decreverit et indies fit desertior, ut pote lectores non habens, qui pueros, quorum inibi magnus esse solebat numerus, et bonis litteris et moribus ad pietatem contendentibus instituerent. Cum igitur officii nostri sit vos vestri commonere officii, quo huic scholae ex professione et eius susceptione obligati estis, vos paterne cohortamur et a vobis postulamus, ut ex vobis duos aut tres viros perinde doctos atque pios ad huius vestrae scholae instaurandum regimen{t} et augmentum cum primis mittatis, ne deficientibus lectoribus et his, qui rei domesticae curam habere debent, schola quae iam ruinam extremam minatur, intereat, et domus conventusque vester cum proventibus et villis, quae vobis ad sustinendum hunc scholasticum laborem sunt adscriptae in civitate nostra Culmensi, vobis adimantur, aliosque in usus convertantur. Nos quantum prestare potuerimus ad omnia, in quibus opera nostra egebitis, nihil a nobis desiderari patiemur, neque reliqui harum terrarum praelati et barones ope et adminiculis suis ad tam pium institutum deerunt, modo tales, qui huic oneri apti videbuntur, quantum fieri potest citius mittatis. Bene valete.

Ex castro nostro Lubaviensi, VI Ianuarii 1536.