Reverendissimo in Christo Patri et Domino, domino Iohanni Dei gratia episcopo Culmensi et administratori Pomezaniensi, dignissimo domino suo gratiosissimo et colendissimo

Reverendissime in Christo Pater et Domine, domine gratiosissime et colendissime.

Servitiorum et orationum humili commendatione praemissa

Nuntiatum est venerabili domino Georgio et mihi in datis praesentium per famatum virum dominum Conradum Brawn proconsulem Thoronensem dominum Nicolaum Plothowsky celerem misisse nuntium versus Cracoviam ad suum germanum dominum praepositum Warmiensem, significando eidem obitum reverendissimi domini Warmiensis aut mortem propinquam, ut pro eodem episcopatu laboraret. Non videtur tamen dignum illum elatum hominem exaltari super cedros Libani. Reverendissima Paternitas Vestra dignetur invigilare, ut illum episcopatum ob multa et magna merita sua obtinere possit. Hoc parvo eidem annexo, ut illud vaticinium domini Bernhardi, germani Reverendissimae Paternitatis Vestrae, quod in studio Cracoviensi existens ex quadam practica habuit, prout in primo ita et in secundo verificari possit. Quod faxit Deus ex sua divina clementia.

Nos hic apud ecclesiam Reverendissimae Paternitatis Vestrae existentes divinam pietatem exorare curabimus continua prece, ut id fieri possit cum salute animae Reverendissimae Paternitatis Vestrae et cum utriusque ecclesiae et Warmiensis, et Culmensis augmento. Cum his eandem Reverendissimam Paternitatem Vestram Deo altissimo committimus in omnibus felicissime conservandam. Raptim celerrime.

Ex Culmenze, ipso die Inventionis sancti Stephani anno Domini etc. XXXV

Eiusdem Reverendissimae Paternitatis Vestrae humiles servitores et capellani Georgius Hyntze et Martinus Czeme canonici Culmenses