Venerabilis Domine amice in Christo dilecte. Salutem in Domino.

Mittimus vobis resignationem, quemadmodum voluistis, quod vero tempus usque post festa Pascatis protraximus, ea ratione factum est, quod tum primum totius anni proventus penduntur, neque indignum putabitis , quod commendarius noster tam diu in officio [e]t domo parrochiali mansurus sit, quousque pro totius anni labore suum pro nobis habere possit praemium. Bene vale[te].

Ex castro nostro Lubaviensi XVI Octobris M D XXX VI

Reverendissimo in Christo principi ac domino, domino Ioanni episcopo Vuarmiensi, domino suo clementissimo

Salutem plurimam ac prompta obsequia mea.

Reverendissime in Christo Princeps ac Domine, domine clementissime.

Ad hunc inclitum conventum Vestrae Celsitudinis et reliquorum statuum mea humilis quidem persona venire debuit ad prosequendam causam, quae nectitur inter mansionarios Gedani ad divum Ioannem et tutores liberorum Georgii Vuoynofsky. Sed podagra, quam Ludovicus Vives dolosum ac iniquum colluctatorem recte appellat, me sic affecit, ut me in posterum vix longius extra moenia moturus sim. Quam ob rem partes meas venerabili domino Ioanni Crusen delegavi velimque Vestram Celsitudinem suppliciter rogatam, ut respectu pii negotii quod aget, eidem benignas aures pro inclita sua pietate praebere ac tandem ipsi controversiae post varias longas ac multas dilationes debitum finem imponere dignetur. Quod quidem Remunerator omnium bonorum et in hac vita et in futura erga Vestram Celsitudinem abunde compensare non omittet, idque ut fiat, suprascripti mansionarii suas preces pro Vestra Celsitudine ad Deum sedulo fundent. Christus Vestram Celsitudinem communi patriae nostrae quam diutissime incolumem ac felicem conservet.

Gedani, V Idus Maii, anno etc. XLI.

Vestrae Celsitudini nuncupatissimus Urbanus Ulrich

Ioannes Dei gratia etc. significamus tenore praesentium quibus expedit universis, quod nos commendatum habentes venerabilem dominum Urbanum Ulrici artium magistrum ac officialem Gdanensem ei ecclesiam nostram parochialem beatae Mariae Virginis in civitate Gdanensi praecipuam resignandam duximus, quemadmodum et tenore praesentium hac tamen adiecta, quae subsequitur, condicione sollemniter resignamus, quod primum commendarius noster, qui toto anno onera ecclesiae sustinuit, pro labore suo usque ad dominicam Quasi Modo Geniti proxime futuram omnes proventus ecclesiae et oblationes in officio suo manens nostro nomine percipere ipsaque dominica praefata eidem domino Urbano de domo parochiali e[t] usu eius cedere debeat relictis in ea rebus omnibus, quas primo ingressu [i]n ea invenit. Proinde reverendissimum in Christo patrem et dominum, dominum Ioannem Dei gratia episcopum Vladislaviensem orandum duximus, ut cum paternitas eius reverendissima cum iis nostris litteris de investitura praestanda per ipsum dominum Urbanum reverenter requisita fuerit, quod ad eam sub condicione superius expressa resignationem nostram, quam vigore praesentium coram eius paternitate reverendissima sollemniter omnibus forma et modis quibus possumus melioribus facimus, eidem domino Urbano non gravate curam animarum [in] eadem ecclesia committere atque investituram concedere velit.

In cuius rei certius testimonium has scribi et sigillo nostro communiri iussimus manuque nostra propria subscripsimus.

Actum et datum in castro nostro Lubaviensi, XVII Octobris MDXXXVI.