Unsern fruntlichn grues und dienst mit aller seligheit wunschung zuvorann. Hochwirdiger in Goth, gunstiger, liber herr und {nackbar}. /

Ewer Lieb schreiben mit den zceitungenn hab wir fast gernn gelesen , / dar aus wir spuren Ewer Lieb sunderlich freuntlich gemuet gen uns / , das selbtige wir zu grossem dancke an nhemenn / mit gleichmessigemm erbittenn, uns Ewer Lieb zu willen und wolgefallenn in aller {nackparlicher} freuntschafft zu halten / etc. / Und so wir dergleichen / von czeitungenn, / der wir alle stunden aus vil orternn sein wartenn, / etwas uberkomenn, / wolle wir sie Ewer Lieb mit den erstenn nicht bergenn. /

Was den konig von Engelland und sein uncristlich wesen belangt, / ist im ergangen, / wie im liede gesungen wirt / und noch so grosser liebe kompt gros hercze leidt. / Es wirt gesagt, / das die sein beyslefferin, / die er negst hot lossen enthoupten, / sein tochter sey gewest / und disse sey ouch sein tochter im eebruche geczeuget, die er iczt wider zur betgesellin genomenn. / Sein endt, / das nicht weit ist, / wirts alles mit bringen. / Got ist langmuttig, / darnoch ein scharffer beczalerr.

Was Ewer Lieb schreibt vor unsern underthan seines weibs halben, / ist in unser wissenheit nicht komenn. / Und dieweil uns sunst solche unluste gancz widerig, / wollen wir uns der gebur, / so solchs vor uns kompt, und Ewer Lieb vorschrifft noch halten. / Ouch wor wir sunst Ewer Lieb vil fruntlichlichn {nackparlichn} wolgefallen wissen zu erczegenn, / sein wir erbottig und willig. /

Datum aus unsermm slosse Lobau, den ... Iulii MDXXXVI.

Unsernn freuntlichn grues, willige dienst und alles guts zuvoran. / Hochwirdiger in Goth, gunstig[er], lieber her und nachparr. /

Dieweil wirs da vor hal..., das wir aus sunderer zcwischen uns freuntscha[ft] nicht in allem geteilt sein, / hab wir gernn uff genomenn, / wie wol unsers achtens unnoth / Ewer Lieb zcwene geladenn wagenn / mit [uffentliche[mm]] unseremm brive zuvorschreibenn / mit erbittun[g] willig zu sein, worr wir sunst Ewer Lieb, / die wir Gothe in sein gnad befelenn, / mugenn freuntl[i]chen wolgefallenn thun. /

Dat[um] [aus] unsrem slosse Lobau, den ....

Hochwirdiger in Got gelipter her und freundt. /

Wir sein bericht, das unser etwan pfarrer der newstat Elbing, der lesterliche mensch, Ambrosius Feyrobent offentlich gepredigt, das im heiligen sacrament, / dar in die cristliche kirch festiglich geloubt zu sein denn worenn und lebendigen leichnam Ihesu Christi, / nichts anders sey dan brot / und brot bleibe mit andrenn etc. blasphemischenn und vorachtlichnn wortenn. / Derwegen er sich vor uns zugestellenn bey treu und ehre vor eimm ersamenn rot zum Elbinge vorbunden / und so trew und ehr schantlich nochgelossen, / an Ewer Liebe vor ein caplan begebenn, / den Ewer Liebe angenomenn und, was er vorschulde und gutter vorlossen, gefurdert, / des wir uns nicht wenig thun wundern. Hiruff losse wir Ewer Liebe wissenn, / das wir al das jenige, was der teuflichsse mensch vorlossen aus unser auctoritet zum Elbing behemmet habnn und vorspert, / wil er das habnn, / das er sich uns gestelle. / Im sol recht geschenn. Dis hab wir Ewer Liebe fruntlicher weis nicht mugen bergenn.

Datum aus unserm sloss Heilsberg, XXIII Iulii MD XXXIX.