Ioannes von Gots gnad bischof zcu Ermelandth

Unsernn gnedigen grues zcuvor. Erbarer, liber, getrewer. /

Wir haben in vorschienem jare die clage, so Fabian Ludcke unser underthan wmmb enthaldunge seins erbgeldes, / des er uf im scholczampt zcu Dithrichsdorf sthend het, / entscheiden, / und daneben die unrechte aufladunge / und vorendrunge des dienstes, / der uns vom ganczen gutt und nicht von dreien scholczhuben zcukompt, /der gestalth hingelegt und Dir geboten, das die Fabian Ludcken sampt den andernn des erbgelth heben lassen soldes und des gelth dem scholczen, welchs er vor dis ubelgegeeben Deine vorschreibung die wir ge[b]iliget und un...ichtig erkant, hot geben mussenn widderlegen, / und den dienst, so Du und nicht er von uns erforderth noch laut eins privigien selbisch thu. / / Iczt stellen die part die clage von newes fur und zcaigen an, das von Dir deren kains / gahalden wirth, / dan die Ludcken des erbgelth vorboetest zcugeben / und den scholczen zcu voriger unleidlicher dienstplicht die Du und nicht [e]r uns schuldig drangen thust / oder thu seins ampts und aldherkomenden bosiczes entseczenn / furnymst. So solchs gescheenn (: welchs uns schwerlich glaublich :), wollen wir, das Dus uns warlich und schriftlich beantwortesth, / oder auf den negsth rechts tag vor Sankt Jacobi feyr personlich bey vorlust Deins lehens hie uff unserr schlos Helsperg vor uns personlich gestees auf vorgelegte clage zcu antworth .

Datum uff unserm schlosse Heilsberg , den leczsten tag Iunii M D XLIII.

Dem erbarnn, unsermm libnn, getrewen Jacob Alexswangen, besiczer des guts under uns Dittirchdorff etc.

Unsernnn etc.

Gestrigs tages haben wir von Ewer Erbarkeit sonn Martino diese hie bei gebundne briefe, die wir Ewer Erbarkeit zu schicken, / erhaltenn, / der sich den vliesig kegen uns thut bedancken, das wir ihm / in den dinst, / do ehr sich sher wol hat, / vorhelffenn habenn. / Seindt auch gerne Ewer Erbarkeit in dem zugefallenn gewesenn, / und gunnen ihrem sone wol, / das ehr alda seine besserung suche / und sich also vorhalte, / damit ess ihm fromlich und Ewer Erbarkeit und den ihren rhumlich sei. / Sunst bitten wir freundtlich, / das Ewer Erbarkeit ihren eltesten einem ersamen radt wolte erzeigen, / hirauf bedocht zu sein / und aufs erste ihren secretarium an uns zufertigenn, / durch welchen wir ihnenn wollen wissen lassen, / was sich mit ihres ungehorsamen underthanes Jacob Schreters sachen hebet / und uns davon, / sunderlich was das geleidte botrift, / so an ihm von einem ersamen radt soll gebrochen sein, / von hove ist zukommen, / und ferner unsernn radt, / was darin zuthunde sei, mitteilenn. / Wo wir auch Ewer Erbarkeit person, / die wir dem almechtigen mit langweriger gesuntheit bovelen, / hernacher vielen furderlichen willen kundten erzeigenn , thun wir das idere zeit gerne. /

Datum aus unserm schlosse Heilsberg, 25 Junii XLVII.