Reverendissimo in Christo patri et domino, domino Ioanni Dei gratia dignissimo Culmensi episcopo etc., domino et patrono honorandissimo

Reverendissime et honorandissime mi domine.

Fui a puero et tenera illa aetate mea Dominationis Vestrae Reverendissimae ita, ut nullius magis, semper observandissimus, verum nulla [u]mquam mihi praestari potuit tam opportuna et grata occasio, qua re ipsa et effectu demonstrare potuissem sincerum illud meum et benevolens studium erga Vestram Dominationem Reverendissimam. Cuius optimam in me affectionem et candidissimum animum plurimis eisdem evidentissimis demonstrationibus cognoveram, donec pridie e contubernali et amico meo domino Kyewsky, canonico et bono servitore Vestrae Dominationis Reverendissimae intelligens petiisse a reverendissimo domino Cracoviensi Dominationem Vestram Reverendissimam hospitium pro suo felici Cracoviam adventu et a castro et a curia suae dominationis reverendissimae non remotum, ratus mihi et iam tandem nonnihil occasiunculae praestitisse superos declarandae meae in Vestram Reverendissimam Dominationem veteris immo perpetuae observantiae, ultro et libere usum meae domus pro futuris nuptiarum solemnitatibus Dominationi Vestrae Reverendissimae obtuli et libentissimo ac hilari animo offero, et licet vix sum dignus, ut intres sub humile tectum meum, domine. Quia tamen et arci et reverendissimo Cracoviensi vicinum et satis spatiosum est, non puto futurum Dominationi Vestrae Reverendissimae et suis ita incommodum, ut ei domum domini Hechler aut alterius cuiuspiam civis praeferre debeat. Habebit praeterea Dominatio Vestra Reverendissima me, qui et hospitis et servitoris munia obiturus sum et in singulis quibusque rebus diligentissime morem ges<t>urus Dominationi Vestrae Reverendissimae, quascumque mihi demandare non dubitaverit. Cuius gratiae feliciter valiturae servitutem meam diligentissime commendo.

Cracoviae, die XIII-a mensis Augusti anno Domini 1535.

Eiusdem Dominationis Vestrae Reverendissimae perpetuus servitor custos Cracoviensis

Reverendissimo in Christo Patri et Domino, domino Ioanni Dei gratia episcopo Culmensi, domino et domino colendissimo

Reverendissime in Christo Pater, amplissime antistes et domine, domine colendissime.

Perpetuam deditissimae servitutis meae in gratiam eiusdem commendationem etc.

Ita me amet et fortunet Deus Omnipotens me non exiguo quodam pudore affici, rem ita rustice et praepostere succedere, quod primis Dominatio Vestra Reverendissima me quam ego ipsam Dominationem Vestram Colendissimam iucundissimis, prolixis et gratiosis litteris suis invisere dignata est, quibus et seria quaeque, et illos numerorum colloquiorum suavissimos iocos perstringere dignata est.

Causa erat, mi Reverendissime Domine, mei tam diuturni et constantis silentii mea a Cracovia absentia, de qua Dominationi Vestrae Reverendissimae in excusationem meam dominum Kyewski, bonum Dominationis Vestrae Reverendissimae servitorem, intellexi scripsisse. Nunc mihi est plus otii et temporis, sed novarum rerum prorsus nihil est, quibus me Dominationi Vestrae Reverendissimae, gratiosissimo Domino meo, insinuem.

Haec forsan iam apud se vetera legere dignetur et deditissimam servitutem meam habere dignetur commendatissimam.

Quam Dominus Deus fortunet, augeat et conservet ....

Cracoviae, die III-a Iulii M-o D-o XXXVI-to.

Deditissimus servitor Vestrae Dominationis Reverendissimae Petrus Conarski custos Cracoviensis scripsit